Mizoramah Covid-19 hri thar Alpha leh Eta variant vei an awm

Mizoramah Covid-19 hri thar Alpha variant leh Eta variant vei an awm tih finfiah a nih thu nimin khan Covid-19 thupuangtu Dr Pachuau Lalmalsawma'n a puang. Covid-19 hri thar veite chu Aizawl district-a mi pahnih an ni.

Dr Pachuau Lalmalsawma chuan, Covid-19 hri chhuak thar a awm leh awm loh finfiah turin Mizorama hripui veite swab sample 100 chu whole genome sequencing turin National Institute of Biomedical Genomics (NIBMG), Kalyani, West Bengal-a thawn a nih thu a sawi a, "July 20, Nilaini khan result hriat a ni a, sample 100 kan thawn zinga 75-ah Covid-19 hrik thar chi thum - Alpha (B.1.1.7) variant pakhat, Eta (B.1.525) variant pakhat leh Delta (B.1.617.2) variant 73 hmuh a ni," a ti.

District pali aṭanga sample 100 thawn aṭangin Covid-19 variant hrang hrang hmuh a nih thu sawiin Dr Lalmalsawma chuan, "Aizawl district-a sample lak 70 zingah sample 56 chu Delta variant a ni a, Alpha leh Eta variant pakhat ve ve a awm. Lunglei district-a sample 10 lak zinga pakua, Kolasib district-a sample 10 lak zinga panga leh Serchhip district-a sample 10 lak zinga pathumte chu Delta variant vek a ni," a ti a; Mizorama district dangah pawh hrik thar a awm theih tawh thu sawiin, mipuite chu fimkhur a, sorkarin inkaihhruaina a duante zâwm turin a chah.

Dr Pachuau Lalmalsawma chuan, swab sample thawnna hmun NIBMG, West Bengal chu India hmarchhak state pariatin an inṭâwm avangin sample endikin hun a duh rei deuh ṭhin thu leh result an hriat har deuh ṭhin thu a sawi a ni.

Covid-19 Spokeperson tarlan ṭhenkhat
1. Zirchianna neih tawh chinah Delta variant vei zinga 0.1%, Alpha variant vei zinga 2% leh Eta variant vei zinga 2.7% an thi.
2. Alpha variant leh Eta variant-te chu Britain-a piang chhuak a nih avangin ram páwn aṭanga khualzinte'n Mizorama an ken luh, inkai darh tâk nia ngaih a ni.
3. Covid-19 chi dangte pawh Mizoramah a awm tawh em tih hriat tumin hmalak zel a ni.
4. July 15, 2021 khan Covid-19 vei mi 150-te sample chu whole genome sequencing turin NIBMG, Kalyani, West Bengal-ah thawn leh a ni.
5. Variant chhuak thar zingah Eta variant a hlauhawm bik a, hri vei zinga 69% chu ICU-a enkawl an ngai.
6. Delta variant chu ram tinah a awm tawh a, Alpha variant chu ram 175 leh Eta variant chu ram 67-ah hmuh a ni tawh.

NIBMG-a sample thawn dan
* March 2021 - Sample 69 thawn a ni a, variant thar an hmu lo
* April 2021 - Sample 217 thawn zinga 4-ah Delta variant an hmu
* June 2021 - Sample 100 thawn zingah Delta 73, Alpha pakhat leh Eta pakhat an hmu
* July 15 2021 - Sample 150 thawn a ni a, result hriat a la ni lo