KHAWTHLIR

Endik rûnpui Chhunzawm a ni
Mizoram sorkar chuan Covid-19 vei an awm leh awm loh hriat nan nimin khan Aizawlah swab sample endik rûnpui (mass test) a kalpui chhunzawm. Endik rûnpui hi veng paliah neih a ni a; Thawhlehnia an zawh hman lohna Armed Veng South, Bethlehem Vengthlang leh Chhinga Veng bakah, Ramthar Vengahte a ni. He thu ziah lai hian hripui vei hmuh chhuah zat kan hre hman lo.

Containment zone
Aizawl DC Dr Lalhriatzuali Ralte chuan nimin khan College Venga chhungkaw 45 leh Muthi khuaa chhungkaw 22 awmnate containment zone-ah a puang a; Maubawka chhungkaw 17 leh Tuikual North-a chhungkaw pariat awmnate micro-containment zone-ah a puang bawk. Dawrpui, Dinthar, Electric Veng, Kulikawn, Bethlehem Vengthlang, Chawlhhmun leh Chhinga Venga containment zone-a puan tawh ṭhenkhat chu hlih a ni a, hmun ṭhenkhat, containment zone la ni zui zel a awm bawk.

Kawlphethain man vangin thi
Nimin zing khan H Vanlalawmpuia (27) s/o H Vanlallawma, Ṭhuampui chu kawlphetha (electric current)-in a man a, a hliam tuar loin nimin chhun khan a thi. Thu dawn danin, H Vanlalawmpuia hi an in chunga electric hrui (11kV line)-in a man nia hriat a ni a, a man lai hmutu an awm lo. Current-in a man tih hriat a nih veleh Greenwood Hospital panpui a ni a, chhun dar 11:20-ah a thi a ni.

Tanpuina hlan
Chaltlang Branch YMA chuan Thawhlehni khan an kum 74 tlin lawmna chi khat atan Vairengte Joint YMA hnenah Rs. 60,000 leh puan 50 an hlan. Sum hi Chaltlang Branch YMA leh Chaltlang khawtlangin an thawh khawm, Vairengte YMA-ten an mamawh ang anga an hman tura hlan niin, puan hi Mizoram mi, state pawna boral ruang hlawm ṭhin an nih anga Vairengte YMA te mamawh phuhruk na tur a ni.