COVID-19: Mizoram dinhmun : Hripui vei 725 hmuh belh a ni
July 20, 2021 khan Mizoramah Covid-19 vei mi 725 hmuh chhuah a ni a, July thla chhungin mi 8,528 hmuh chhuah a ni tawh. Nimin khan hripui laka fihlim tawh mi 170 chhuahtir an ni a, hripui vangin mi pahnih an thi.
Covid-19 vei hmuh tharte chu mipa 321 leh hmeichhia 404 an ni a; ZMC laboratory-a hmuh chhuah mi 44, TrueNAT hmanga hmuh mi 34 leh RAT hmanga hmuh mi 647 an ni. Aizawla veng 51 leh khaw dang 34-a mite an ni a; Lungleia veng 10, Kolasib-a veng 10 leh Lawngtlaia veng pasariha mite an tel.
Tun July thlaah ni 20 chhungin Covid-19 vei mi 8,528 hmuh a ni tawh a, chawhrualin ni tin mi 426 chuang hret (426.4) hmuh chhuah an awm ang a ni. July thla ni 20 chhunga hmuh zat hi a hmaa hmuh chhuah tam ber thla, June 2021-a hmuh chhuah zat 8,093 aiin 435-in a tam tawh zawk.
IDSP record angin, Mizoramah Covid-19 vei mi 29,020 hmuh chhuah a ni tawh a, mipa 15,892 leh hmeichhia 13,128 an ni. Nimin tlai dar 5 thleng khan mi 22,231 (76.60%) chhuahtir an ni tawh a, mi 127 (0.44%) thi tawhin, enkawl mek mi 6,662 (22.96%) an awm.
July 20, 2021 thlengin Mizoramah swab sample 5,69,204 endik a ni tawh a, chu'ng aṭanga Covid-19 positive hmuh tawh zat 29,020 chu 5.10% a ni. Hripui vei hmuh tawh zinga mi 21,870 chu Mizoram chhunga kái chhâwng an ni a, mi 4,150 chu Mizoram páwn aṭanga an rawn luh hnua hmuh chhuah an ni.
July 20, Thawhlehnia swab sample endik dan chu - ZMC-ah 1,389, TrueNAT hmangin district 10-ah 350 leh RAT hmangin district 10-ah 2,791 a ni a, a vaiin sample 4,530 niin, chuta ṭanga hripui vei hmuh chhuah 725 chu 16% a tling. Positive percentage hi ZMC-ah 3.16%, TrueNAT-ah 9.71% leh RAT-ah 23.18% a ni.
Thawhṭannia district-a Covid-19 positive hmuh dan chu - Aizawl district-ah mi 461, Kolasib-ah 116, Lungleiah 72, Mamitah 33, Lawngtlaiah 25, Siahaah 16 leh Serchhipah mi pahnih an ni. Hripui vei hmuh thar mi 725-te chu natna lang chhuak 435 leh lang lo 290 an ni a; tualchhunga kái vek niin, kàina chin hriat loh mi 379 an awm.
ZMC laboratory-a hmuh chhuahte mi 44 zingah symptom nei pahnih an awm a; tualchhunga kai vek niin, kàina chin hriat loh pathum an awm. TrueNAT hmanga hmuh mi 34 zingah symptom nei pahnih leh kaina chin hriat loh pahnih an awm. RAT hmanga hmuh mi 647 zinga 431 chu symptom nei an ni a; tualchhunga kái vek niin, mi 374 chu kàina chin hriat loh an ni.
Mi 725 zingah naupang kum tling lo 210 vel telin, an zinga 100 velin symptom an nei a; nausén kum khat tling lo panga an awm. Kum 60 chung lam mi 70 vel an awm a, a zatve velin symptom an nei a, a upa ber chu kum 97 mi an ni.
Nimin khan tlai dar 5 thlengin hripui laka fihlim tawh mi 170 chhuahtir an ni a; Kolasib district-ah mi 52, Aizawl district-ah 38, Lunglei district-ah 33, Mamit district-ah 22, Siaha district-ah 15 leh Lawngtlai district-ah mi 10 an chhuak. Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 8,168 hmuh chhuah a ni tawh a, TrueNAT-PCR hmangin 1,827, RAT hmangin 19,024 leh Guwahati-ah pakhat hmuh chhuah a ni tawh.
