Covid-19 vangin mi 2 thih belh

Thawhlehni zan leh nimin khan Mizoramah Covid-19 vangin mi pahnih an thi leh a; sorkar chhinchhiah angin, nimin tlai dar 5 thlenga hripui vanga thi zat chu mi 127 an ni tawh.

Covid-19 vei State Referral Hospital-a enkawl lai Lalfima (73) h/o Lianthangpuii, Venghlui chu July 20, Thawhlehni zan dar 8:10 ah a thi a, nimin chhun dar 12 khan Central Hall-ah vui a ni. Thu dawn danin, Lalfima hi hriselna ṭha vak lo sa a ni a, Covid-19 positive a ni tih July 18, 2021 khan hmuh chhuah niin, SRH-ah enkawl nghal a ni.

Lalbeiseia (71) h/o Lalmuanawmi, Vairengte Bangla Veng pawh nimin zing dar 9:50 khan State Referral Hospital-ah Covid-19 vangin a thi a, hripui vanga thi 127-na a ni. Amah hi thaw-hah nei sa a ni a; Covid-19 positive a ni tih July 13, 2021 khan hmuh chhuah niin, July 15 khan SRH-ah dah luh a ni. Nizan khan Bangla Veng YMA Hall-ah lumen a ni a, vawiin chawhma dar 11-ah vui a ni ang.

Sorkar chhinchhiah angin, nimin tlai dar 5 thleng khan Mizoramah Covid-19 vangin mi 127 an thi tawh a, thla kal mek, July thla bikah mi 34 an thi tawh a ni.