Lungleia RT-PCR laboratory dinna tur Tihkhawtlai dan zawngah sorkar puh

Mizoram Pradesh Congress Committee (MPCC) chuan, Aizawla swab sample endik rûnpui kalpui a ni ta chu lawmawm an tih thu leh Covid-19 chu total lockdown hmang ringawta do hneh chi a ni lo tih Mizoram sorkarin a hre ta chu lawmawm an tih thu an tarlang. Lungleia RT-PCR laboratory dinna tur tihkhawtlai dan zawngah MNF sorkar an puh nghal bawk.

MPCC chuan thuchhuah siamin, MNF sorkar chu Lungleia RT-PCR laboratory dinna tur tihkhawtlai dan ringawt zawngah puhin, hriatthiam har an tih thu an sawi a, "RT-PCR hmanga MNF sorkar politics khelh dan hi mipui hriselna atana hlauhawm leh mipui zah lohna dik tak a ni," an ti a; sorkar hmalak dan ṭhat tâwk loh vanga hripui kai zat tlahniam thei lo chungchangah mipui mawhpuh tawh lo turin sorkar an chah.

Congress party president Lal Thanhawla'n sample endik rûnpui nei tura June 7, 2021-a sorkar a ngennain ngaih pawimawh a hlawh dawn ta niin MPCC chuan an tarlang a, "Hripui donaah sorkar a harh ṭan ta nia kan hriat avangin kan lawm hle. Covid-19 hi total lockdown hmang ringawta do hneh chi a ni lo tih sorkarin a hre ta hi a lawmawm kan ti hle bawk," an ti.

MPCC tarlan danin, swab sample endik rûnpui atan sorkarin sum tam tham tak a sèn a ngai dawn tih an hria a, chuti chung chuan, hripui veite rang taka hmuh chhuah a, enkawlna an dawn hma dawn avangin hmuh chhuah har vanga State Referral Hospital leh ICU-a enkawl ngai nasa takin a titlem dawn a, chu chuan sum tam tak a hum dawn a ni.

Endik rûnpui chu RAT mai ni lo, RT-PCR hmanga a tam thei ang ber tih ni se an duh thu sawiin MPCC chuan, "Mass testing nei tura eptu party-te'n kan rawt tirh khan awmze nei zawka kalpui ni tawh se chuan, hri vei hmuh a tam ang a, nunna chán loa enkawl dam an pun lehzual a rinawm," an ti a; hripui chu ṭangruala do chi a nih avangin eptu party-te thuràwn ngai pawimawh tawh turin Mizoram sorkar a beisei thu an sawi.

Congress party chuan, awmze nei zawka Covid-19 do a nih theih nan district tinah a rang thei ang bera RT-PCR bun theihna tur laboratory din turin Mizoram sorkar an phût bawk.