AMC-in bawlhhlawh a paih hneh tawh - Mayor Free

Aizawl Municipal Corporation (AMC) mayor PC Lalhmingthanga chuan, Aizawl khawpuia bawlhhlawhte hneh zawka paih a nih theih nan ṭan an la a, tunah chuan an paih hneh thawkhat tawha an ngaih thu a sawi. Aizawl hmun ṭhenkhata free wifi an pek chungchangah, contractor chu show cause notice an pe tawh a, March 2018 thleng an nghak dawn tih a sawi bawk.

Aizawl Mayor leh MNF councillor dangte'n nimin khan Aizawl Press Club-ah thuthar thehdarhtute an kâwm a; Mayor chuan, SIPMIU-in bawlhhlawh paih motor 54 (MMV 50 leh LMV 4) AMC hnena an pek chu a hmaa bawlhhlawh paih dan thlak hlawkna tura an duan leh DPR siam a nih lai chuan ni khatah vawi khat tlantira bawlhhlawh paih hneh tura chhût a nih thu a sawi a, "Mahse, tunah bawlhhlawh a tam tawh avangin vawi hnihte tlan a ngai ta a ni," a ti.

PC Lalhmingthanga chuan, motor an dawn 54 tlan dan tur an ngaihtuah a, a hmaa bawlhhlawh paih nana motor an hman a lian chi (MMV) zawng chu SIPMIU truck hmangin an thlak a, motor tê (LMV)-te erawh chu hman chhunzawm a nih thu a sawi a, "Motor tlan turte hi SIPMIU DPR thlir chungin zone pakuaah ṭhen a ni," a ti a; zone pakua chu garbage collector pakua hnenah pek a nih thu a sawi.

Bawlhhlawh paih motor thar chu a chung nei a nih avangin, harsatna a awm dawn tih an hre lawk tih sawiin Mayor chuan, "Thla ruk chhung enchhin phawt turin December 1, 2017-ah hman ṭan a ni," a ti a; motor chung lamah bawlhhlawh paihna tur kua siam a ni tih sawiin, "Hei hian bawlhhlawh paih chhung a tihrei phah hle bawk," a ti.

Aizawl Mayor sawi danin, bawhhlawh paih kawnga fuh tawk lote chinfelna turin SIPMIU aṭanga motor an dawn truck-te chu a bang an zawm san belh a; motor pawl zawk chu ft. 1.6-in an zawm san belh a, a hring zawk chu ft. 1.11-in an zawm dang thung. Zawm san pahin, a hnung lam zawng hawn theihin an siam a, a hnung lam aṭangin bawlhhlawh paih luh theih a ni.

Zawhna chhangin Mayor chuan, bawhhlawh paih dan a mumal zawk nan leh paih hneh zawk a nih theih nan garbage truck-te an siam danglam bakah, SIPMIU ni lo, private motor dang hman belh a nih tawh thu a sawi a, "Bawlhhlawh motor hi veng hrang hrangah pek belh kan nei ṭeuh mai a, a ziaawm chhoh zel kan beisei," a ti.

AMC-in free wifi a pek, hman mumal theih si loh chungchanga zawhna chhangin PC Lalhmingthanga chuan, contractor Nexcomm chu nikum tawp lam khan an hnathawh dan insawifiah tura hriattirna, showcause notice an pek thu a sawi.

PC Lalhmingthanga sawi danin, Nexcomm hian free wifi chu speed chak zawka tih an tum angin an sawi a, chutiang tur chuan AMC lamin March 2018 thleng hun pek an rêl. AMC free wifi hi Aizawla college pasarihah dah a ni a, free wifi tender amount chu cheng nuai 57 a ni.