ZPM-in Aizawl South III-ah Inpuan chhuahna hun an hmang

Ṭangrual pawl, Zoram Peoples' Movement (ZPM) chuan nimin khan Aizawl South-III Block-I pualin Sialsukah inpuan chhuahna hun an buatsaih a, ZPM headquarters hruaitute'n an hmanpui.

Thu sawitu, MPC vice president Vanlalhlana chuan, sorkar kal tawhte'n political party angin ram siam tumin policy ṭha tak tak an zuar ṭhin tih sawiin, "Tunah erawh ram vei pawl dangte nen, pawl panga inthurualin ZPM an din a. Sorkar ding lai thlak duhtu Mizo mipuite'n sorkar kalphung thar din turin, mipui sorkar i din ang u," a ti.

PL Liandinga pawhin thu sawiin, politician a nih loh thu leh nih pawh a nih ngai loh thu sawiin, "Politician fel tak takte'n kum tam ro an rel a, kan rethei tual tual tih ka hmu. NEDP an ti, SEDP an ti; pawisa sem hmachhuantute hian sum an sem a nih pawhin kan dinchhuah phah lo ang. Khawvel khawi ram mah sum sema dingchhuak an awm lo," a ti a; thawhrim hmachhuana ram siam tum an nih avangin ZPM a zawm ve thu a sawi.

Inkhawm kaihruaitu, Aizawl South-III Block-I ZPM chairman Mal­sawm­tluanga chuan, sorkar kal tawhte'n Mizoram chu ram rethei berah a hruai lut niin a sawi bawk.