Blood donation camp huaihawt

Congress party ṭha­laite chuan, nimin khan Congress Bhavan-ah blood donation camp an huaihawt a; an hun hmanpuitu, Health minister Lal Thanzara chuan, party ṭhalaite'n thisen pek rûnpui an huaihawt chu ropui a tih thu a sawi.

Lal Thanzara chuan, Congress ṭhalaite'n an party pisa ngeia mi dangte tan thisen an pe chu ropui a tih thu sawiin, “Congress ṭhalai rual mi ṭhahnem tak thisen pe tura an fuan khawm hi a lawmawm a, ruahmanna siamtu MPYCC hruaitute an fakawm tak zet. Aizawl Civil Hospital blood bank-a thawktute inpekna pawh a lawmawm hle a ni," a ti.

MPYCC thuchhuah chuan, tun hma pawhin Congress party ṭhalaite'n blood donation camp an huaihawt fo tawh thu an tarlang a; Association for Voluntary Blood Donation (AVBD)-in pawl hminga thisen pe tam lawmman a siamah pawh miscellaneous category-ah’ kum 2016-ah pakhatna leh kum 2017-ah pahnihna an dawn thu an tarlang bawk.

Nimina Congress ṭhalaite'n blood donation camp an huaihawtah hian mipa 119 leh hmeichhia parukte'n thisen unit 125 an pe a ni.