Jeevan Raksha Padak dawng turin F Lalchhandama thlan a ni
F Lalchhandama (17) s/o F Lalmalsawma, Tuikual South chu huaisen chawimawina, Sarvottam Jeevan Raksha Padak, 2017 dawng tura thlan a ni. F Lalchhandama hian May 7, 2017-a Tlawng luia tla a ṭhianpa chhan chhuah a tumna lamah nunna a chán a ni.
President-in a pawmpui (recommend) angin, Ministry of Home Affairs (MHA) chuan F Lalchhandama hi Sarvottam Jeevan Raksha Padak, 2017 dawng tura a thlan mi pasarih zingah a telh a; Award hi President aiawhin Mizoram sorkarin hun remchangah F Lalchhandama chhungte hnenah a hlan ang.
F Lalchhandama hi Mizoram State Child Welfare Commission rawt angin Indian Council for Child Welfare (ICCW), New Delhi chuan National Bravery Award (Posthumous) 2017 a lo hlan tawh bawk a, kumin Republic Day-ah khan Prime Minister-in New Delhi-ah F Lalchhandama pa hnenah a hlan a ni.