Serchhip bial atan MNF headquarters-in Candidate tura an dah apiang an pawm

MNF party ṭhalaite chuan nimin khan Thenzawlah feh­chhuahna hun an hmang a, Then­zawl, Aizawl, Lunglei leh Serchhip aṭangin MNF ṭhalai­te an tel. Resolution pass in, "Serchhip constituency-a MLA candidate tur chu headquarters-in an rawn dah ang apiang lungrual takin kan pawm," an ti.

Thenzawla vantlang in­khawmah hian MNYF president Lalrinawma'n thu sawiin, Mizorama sorkar sikula zirlai an tlem tial tial chhan te, zirtirtu transfer & posting rules mumal awm loh vanga zirtirtu inkhairual lo te, UPSC exam-a Mizo an lut tlem tial tialte chu a chhan an zawn chhuah dawn thu a sawi.

Lalrinawma chuan, MNF an sorkar chuan teacher transfer & posting rules mumal zawk an siam tur thu a sawi a, "SEDP-in a tarlan angin, Manpower department kan din dawn. Thingtlang zirlai tam tak, khawpuia zirlai awmte tan SEDP hnuaiah hostel tam zawk sak kan tum a ni," a ti.

Mizorama hmasawnna hna thawh (contract work) tam tak chu a hun taka zo lo a, estimate ennawn ṭeuh ṭeuh ṭhin a nih avangin sorkar sum leh pai a kal ral tam hle nia sawiin Lalrinawma chuan, "Hetianga project tihkhawtlai vanga sum leh pai tam tak senna hi tihtlema hmalak kan tum. Budget siam chungchangah, sum leh pai hmanna tur ruahmanna ṭha zawk kan siam dawn a ni," a ti a; chutiang tur chuan MNF party an inpeih tawh thu a sawi.

Thenzawla MNF ṭhalai kalkhawmte hian resolution an pass a, "Serchhip constituency-a MLA candidate tur chu headquarters-in an rawn dah ang apiang lungrual takin kan pawm a, MNF MLA candidate Serchhip constituency-a ding apiang a tlin ngei theih nan theihtawpin hma kan la ang," an ti a ni.