Kum 14-23 inkarah drug addict an tam

Champhai District AIDS Prevention and Control Committee (DAPCC) chu nimin khan DC Vanlalngaihsaka hoin DC conference hall-ah an ṭhukhawm. He hunah hian, kum 14-23 inkar zingah ruihhlo ngai (drug addict) an tam thu tarlan a ni.

Meeting-ah hian DAPCU-a district programme manager C Lalruatfeli'n DAPCU-in drop-in centre-a inziak lut, syringe hmanga inchiu ṭhinte zir chianna November leh December 2017 chhunga an neih aṭanga presentation an buatsaih, ‘Epidemiology of HIV/AIDS among IDUs registered at Drop-in Centre’ tih a sawifiah.

Zir chiannain a tarlan danin, inchiuna vanga HIV kaite chu lehkhazir sang lo an ni a, a tam ber chu mipa niin, kawppui nei lo an ni deuh ber. Drug addict zingah sikul bànsan (drop out), naupang lam kum 14 aṭanga 23 inkar an tam a; hei vang hian sikulah awareness kalpui a ṭul tak zet a ni tih a tilang. Damdawi hmang sual tam zawkte chu ni tina inhlawhfate an ni hlawm.

Ruihhlo tih chhin ve hrim hrim châkna vanga damdawi tia addict ta an tam ber a, damdawi addict zinga a zatve dawn chu chhungte ngaihsakna dawng lem lote an ni. Hriau (syringe) thianghlim lo hman pawlh vanga HIV kai an tam ber a, inkai chhawn theih a ni tih erawh a tam zawkin an hre tho a ni.

Zirchiante zinga 86% chu ART-ah an inziak lut a; a tlangpuiiin ni khatah vawi 1-3 inchiu an tam ber. An zinga 55% chu vawi khat thisen test-a HIV positive an ni tih hmuhchhuah a ni.

HIV hluar lam tehna, HIV Sentinel Surveillance (HSS), December 2017-a neihin a tarlan dan chuan, nu naupai (ante natal clinic, ANC) zinga 1.19%-in HIV an kai a, hei hi India ram pum average 0.28% aiin a sang zawk hle. ANC hi ram puma HIV san leh sân loh tehfung ber pakhat a ni.

Meeting chuan, a tam thei ang ber HIV/AIDS chungchangah inzirtirna neih ni se a ti a, chuta tan chuan sorkar department hrang hrang, media, tlawmngai pawl leh khawtlang hruaitute thawkho zel tura hmalak an rel a ni.