Lalsawta'n thlai zawrhna hmun a hawng

Entrepreneurship Development Scheme (EDS) hnuaia Micro Start-up Capital Competition buatsaih tâka lawmman dawngtute zinga mi, F Lal­rawngbawla siam thlai thar zawrhna hmun VegsMart, Venghluia mi chu nimin khan Planning minister Lalsawta'n a hawng.

Lalsawta chuan, mi zawng zawng tan sorkar hna a indaih theih loh avangin, sorkarin NEDP component pawimawh tak pakhat EDS a duan thu a sawi a, EDS hnuaiah mi themthiam leh ngaihtuahna hmang thiamte tan ei­zawnna ngêlnghet din­chhuahpui tham, mipui tana ṭangkai leh awlsamna siamtu ni bawk din theih a nih thu a sawi.

Planning Minister chuan, thlai thar emaw, ran vulh emaw, sum­dawn­na a ni emaw, thil tihna apiangah tih tak zeta luhchilh a, hlâwk tham tura beih a ngai thu a sawi a; kalkhawmte ṭhahnemngai taka thawk turin a fuih.

Planning secretary Dr C Vanlalramsanga sawi danin, F Lalrawngbawla'n VegsMart a buatsaihna atan hian sorkarin 50% a tumsak a, a bak chu ama'n a intum a ni.