Sorkar driver-te'n inkhawmpui an hmang

Mizoram Government Drivers' Association (MGDA) chuan nimin khan Synod Conference Centre-ah inkhawmpui an hmang a, IPR minister Lal Thanzara'n a hmanpui.

Lal Thanzara chuan, sorkar driver-te chu hna zahawm leh pawimawh thawktu, mawhphurhna lian tak chelh an nih thu a sawi a, "Duty hun chhunga ruih theih thil laka insûm leh fihlim a ṭul. Nangmahni chauh ni lo, pi leh pute zahawmna keng tel in ni tih hre reng chungin, hawihhâwmna, thawhrimna, insûm­theihna leh rinawmnate chhawm nung zel ang che u," a ti.

Driver-te hamṭhatna tura sorkarin hma a lak tawhna hrang hrang sawiin Lal Thanzara chuan, "Sorkara thawk an ni emaw, private hnuaia thawk pawh ni se, driver-te tan theihtawp chhuaha an hamṭhatna tur ngaihtuah zel a ni," a ti a; rinawmna nen dik taka hna thawh a nihin nun hlutna a pian ṭhin thu a sawi.

Inkhawmpui hi MGDA president Lal­ramnghaka'n a kaihruai a, an member thi mi 44 sûnna hun an hman bakah, a zawna kum 10 chin an pawl office bearer ni tawh mi pali hnenah hruaitu hlun chawimawina an hlan a ni.

MGDA hian 7th. Pay chungchangah resolution an siam a, 'Thil man to chho zel vanga sorkar laipui leh state dang eng emaw zatin 7th. Pay an hman hnua Mizoram sorkar pawhin a hnathawkte 7th Pay hman ve theih dan tur kawng ngaihtuaha hma a la hi a lawmawm a, a hma thei ang bera hman a nih ngei theih nan hmalak zui a nih kan beisei. He sorkar hmalakna tisukuk thei engmah awm lo turin kan beisei,' an ti.

MGDA hi September 4, 1964-ah din a ni a, November 3, 1987 khan sorkarah Firm & Society hnuaiah an inziak lut a ni.