Tribal tan chhiah âwl turin bank-ah ST certificate thehluh a ngai dawn

State Bank of India (SBI) chuan anmahni dawrtute'n pawisa an dah luha chhiah an chawi ṭhin, Tax Deduction at Source (TDS) chu schedule tribe-te an àwl ta a; SBI-a account neite chu chhiah an àwl theih nan an awmna branch-ah ST certificate theh­lut tura tih an ni.

SBI hotute chuan March 14, Inrinni khan Aijal Club-ah Central YMA leh MJA-te TDS chungchanga hmalakna thar an hrilhfiah. Tribal-te bank account aṭanga TDS lak ṭhin chu Income Tax Act, 1961 hnuaia Section 10(26)-in chhiah âwl theihna a pek angin, tribal-te tan TDS aṭanga àwl theihna awlsam zawk SBI-in a ti­chhuak ta niin an sawi.

SBI hotute sawi danin, tribal-te tan account an neihna bank branch-ah tribal certificate photo (xerox) copy thehluh tur a ni a, SBI branch-ah Annexure A form-a hming ziah a ngai bawk. TDS àwl theihna tura tribal certificate thehluh hi sorkar kum tin (fiscal/financial year tin) thehluh thar a ngai dawn niin an sawi a; hriat chian duh neite chu account an neihna branch-ah ngaihven turin an chah.

Central YMA president Vanlalruata chuan, SBI-in an tih theih ang chu bank dang pawhin ti ve thei ngei se a duh thu a sawi a; MJA president Zonunsanga Khiangte pawhin, SBI chu mipui dawr ber a nih avangin dawr nuam taka awm zel tura a duh thu a sawi bawk. SBI hotute chuan, SBI-a thawkte chu dàwr nuam taka awm turin an infuih ṭhin thu an sawi a, mipuite'n dawr nuam lo deuh an hria a nih chuan an lungawi lohna ziaka thlen ṭhin turin an chah a ni.