Ration buhfai lâk dan thlahdul hret

Coronavirus (CO­VID-19) darh thei vènthâwn avangin electronic point of scale (EPoS) hmanga retailer aṭanga buhfai latute'n kutzungpui thla an nem ṭhin chu March 2020 chhung atan tihtawp rih a ni.

Sorkar laipuiin rua­hmanna a siam angin, thla hmasa aṭang khan Mizoram hmun hrang hrangah EPoS khawl hmangin retailer-te'n mipui hnenah buhfai an sem a; ration card leh Aadhaar number inthlunzawmte chauhin khawlah hian an kutzungpui thla nemin, finger print lak hnuah ration buhfai an la thei a ni.

Thu dawn danin, COVID-19 laka mipui an him theih nan leh fimkhur thilah Mizoram sorkar chuan retailer-te chu EPoS khawlah buhfai la turte chu kutzungpui nemtir kher lo turin a hriattir a; ration buhfai latute Aadhaar number erawh chu kháwl­ah chhut luh a ngai thung.

Hetianga kalpui a nih avang hian retailer-te'n harsatna an tawh phah dawn lo a, EPoS machine-ah ration latute Aadhaar number a luh tho avangin Food, Civil Supplies & Consumer Affairs department lamin an lo chingfel mai dawn niin an sawi.