Aizawlah Lunghlu kg. 7.516 man a ni

Central YMA hnuaia Kumpuan Committee, Customs department leh Mizoram police-a CID ṭangkawp chuan tun hnai khan Ṭhuampui, Aizawlah lunghlu kg. 7.516 an man a, Rs. 18,75,393 hû a ni.

CYMA Kumpuan Committee secretary HF Lalrinpuia hnen aṭanga Vanglaini-in thu a dawn danin, lunghlu hi Suansiamzam, Myanmar mi, tuna Ṭhuampui venga mi in luaha khawsa mek hnen aṭanga man a ni a; Suansiamzam leh lunghlu hi Customs lamin an kawl mek a, a ṭul angin an buaipui zui dawn a ni.

Hetih lai hian, CYMA Kumpuan Committee hian December 19, 2017 aṭanga ruihhlo do hna an thawh aṭangin ruihhlo kaihhnawihah mi 467 an man tawh.

HF Lalrinpuia sawi danin, ruihhlo kaih­hnawiha an man zinga 15 chu Excise & Narco­tics department kutah an pe a, paruk chu Police hnenah an hlan thung. Ruihhlo lama inhnam­hnawih nasa tawh deuhte chu Home-ah dah an ni a, an mamawh hrang hrangte chuan Kumpuan Committee member-te'n an tumsak ṭhin. Ṭhenkhat chu counselling pek ṭhin an ni a, counselling hna hi AIKO-te'n tlawmngaiin an thawk a ni.

HF Lalrinpuia chuan, Mizoramah ruihhlo a hluar nasat avangin ṭanho a ṭul thu a sawi a, "Kohhran ṭhalaite pawh tun aia nasa zawkin ruihhlo do kawngah hian rawn pên chhuak se a duhawm hle. Kan mi mante hi an member-te vek an ni," a ti.