Central YMA bultumin Aizawlah CADC ṭhiah chungchang sawiho

Central YMA chuan, nimin khan CYMA hall-ah 'Chakma Autonomous District Council (CADC) ṭhiah' tih thupuia hmangin inràwnkhawmna an buatsaih.

Inràwn khawmna hi CYMA presi­dent Vanlalruata'n a kaihruai a; thupui sawi hawngtu CYMA general secretary Lalhmachhuana chuan, CADC ṭhiah chu inhnialna tawp thei lo tur a nih thu sawiin, "CADC ṭhiah tih hian tharum hmang emaw, rîk buan buan lam a kâwk lo. Dan hmanga ṭhiah theih dan zawn hi YMA tum chu a ni," a ti.

Lalhmachhuana chuan, CADC chhunga cheng Chakma-te chu engtik lai mahin ram leilung faah an pawm thei lo tih a sawi rualin, "Mizoram chhungah ro inrel hranin, 6th. Schedule hnuaiah district council hran neiin an awm tlat si hi eng vang nge tih zawhna pawimawh tak a ni," a ti a; hetiang a nih avang hian sawihona buatsaih a nih thu a sawi.

Sawihonaah hian YMA CEC member te, sub-headquarters hruaitu te, kohhran, tlawmngai pawl leh political party aiawhte an tel a ni.

YMA General Conference, October 17-19, 2017-a Champhai Zotlanga neiha rorelah, 'Dan loa din Chakma Autonomous District Council hi dan hmanga ṭhiah ni rawh se,' tih pass a ni a, chumi bawhzui chuan inràwnkhawmna hi buatsaih a ni.