Delhi-ah Magnetic Mizoram Roadshow

Innovations India buatsaihin The Leela Palace Hotel, New Delhi-ah Magnetic Mizoram Roadshow buatsaih a ni a, chief minister Lal Thanhawla'n a hmanpui. He hunah hian Mizoram dinhmun hrang hrang tarlan a ni.

CM Lal Thanhawla chuan, Aizawlah Mag­netic Mizoram Summit Investors Meet neih tum a nih thu sawiin, corporate leh investor-te tel turin a sáwm a, "Mizoram sorkarin NEDP hmangin chak taka ram hmasawnna atana hna a thawk a, chumi tihlawhtling lehzual turin corporate aṭanga investment mamawhna a lian hle," a ti.

Mizoramin kawng hrang hrangah theihna a neihte chhawr ṭang­kai tur leh zir chiang turin sumdawng lian kalkhawmte sáwmin CM Hawla chuan, "Sector hrang hranga investment hlâwk taka kalpui theih a nih ngei ka ring," a ti a; Mizoram sorkar hna­thawhna kawng hrang hrangah corporate-te nen thawh dun a ṭul thu a sawi.

Planning minister Lal­sawta pawhin thu sawiin, "Mizoram sorkarin Pla­ning Commission nuaibo a nih hnuah leh 14th. Finance Commission rawt­na hman a nih hnu­ah New Economic Deve­lopment Policy a duang a, ram hmasawnna chak takin a kalpui a ni. Investor-te nena an ṭang dun thei a nih chuan hma­sawnna a chak leh zual theih ka beisei," a ti.

Roadshow-ah hian Planning secretary Dr C Vanlalramsanga'n Mizo­ram chanchin leh dinhmun tlangpui a sawi a; Horticulture director Dr Saipari'n horticulture sector dinhmun leh thawhho theihna kawng hrang hrang sawiin, Tourism director Biak­thanmawia Pautu-in Mizoram tourism desti­nation a siam tura hma­lakna kawng hrang hrangte a lem nen an sawifiah bawk.