Lunglei ṭhalaite'n minister an dang

Nimina Lunglei Sazaikawna Mul­tipurpose Indoor Stadium hawng tura kal Sports & Youth Services minister Zodintluanga chu Lunglei ṭhalaite'n lungawi lohna lantir nan an lo dang.

Lunglei aṭanga thu dawn danin, Mizoram PWD-in World Bank Road-a Lunglei-Haulawng inkar bik chhia an siam mek a, kawng siam hna chu an thawh muan em avangin Lungleia ṭhalai intêlkhawmte chuan lungawi lohna lantir nan nimin chawhnu dar 1-a Sports Minister Indoor Stadium hawng tura a kal chu stadium thlen hma lawkah an lo dang a ni. Hotute an inbiak rem hnuah minister hi an kaltir niin an sawi.

Lunglei Ṭhalai hian resolution an siam a; World Bank Road, PWD Lunglei Road Division chan chin hi (Lunglei to Kanghmun South) maintenance na tur sum Finance department-a táng mek hi February 9, 2018 zan dar 12 hma ngeia release order tihchhuah ni rawh se, an ti a, order copy chu hmuh an duh thu an tarlang.

Resolution-ah hian Lunglei district-a MLA palite chuan hming an ziak a, 'Resolution no. 4 tihlawhtling tur hian chak takin hma kan la ang,' tiin an intiam a ni. Resolution lehkhaa intiam­naah hian minister Zodintluanga leh PC Lalthanliana, Lunglei district-a MLA dang pahnih - S Laldingliana leh Chal­rosanga Ralte ten hming an ziak a ni.

Resolution point dangte chu:
2. He kawng siam ke hna thawktu department/contractor-te hian hna thawktu dah belh rawh se.
3. He kawng siamtu contractor hming hi puanzar ni rawh se.
4. Tuna an kawng siam lai mek hi April 15 hma ngeiin siam zawh ni rawh se.
5. Lunglei to Kanghmun S' inkar kawng siamna tur sum a rang thei ang berin dah ni rawh se.