Sazaikawna Indoor Stadium thar hawng

Sports & Youth Services minister Zodintluanga chuan, nimin khan Lunglei Sazaikawna Multipurpose Indoor Stadium sak thar a hawng a, hall hawn tak chu Mizorama sport indoor hall lian ber a nih thu a sawi.

Stadium hawnna inkhawmah hian minister Zodintluanga chuan, stadium tharah chuan state level basketball, volleyball leh indoor game hrang hrang khelh theih a ni dawn tih sawiin, "Aizawla indoor hall lian ber R Dengṭhuama Indoor Stadium angin kohhran hrang hrang inkhawmpuina atante thlengin hman theih a ni dawn a ni," a ti.

Stadium thar chu Lunglei ṭhalaite'n ṭangkai taka an a beisei thu sawiin, "Sorkarin hall thar a rawn chhawp tawh che u a, associa­tion hruaituten in hman ṭangkai ngei ka beisei," a ti a; hman ṭangkai a nih loh chuan SAI Extention Centre atan pawh a ṭha dawn hle tih a sawi.

Multipurpose Indoor Stadium sakna atan hian kum 2012-13 ah Ministry of Youth Affairs & Sports hnuaia Urban Sports Infrastructure Scheme (USIS) aṭangin cheng nuai 600 hmuh a ni a, a sak hna chu Lushai Engineers, Ramhlun South, Aizawl-in an thawk. September 26, 2013-ah hna thawh ṭan a ni a, August 30, 2017-ah sak zawh a ni.