KHAWTHLIR

Thisen pe
Pachhunga University College NSS Unit chuan, nimin khan an college-ah blood donation camp an huaihawt a, Aizawl Civil Hospital tan thisen unit 278 an pe a, a petute mipa 166 leh hmeichhia 112 an ni.

Lehkhabu tlangzarh
C Darlianthanga lehkhabu buatsaih, 'Keipui rilṭám leh Zadingi' tih chu nimin khan Aizawl Press Club-ah Mizoram State Commission for Women chairperson M Zohmingthangi, AMC councillor-in a tlangzarh. Lehkhabu hi Zadingi, Buarpui-in sakei a cheh hlum chanchin ziahna a ni a, Rs. 100 man a ni.

ZNP thalai hruaitu
Zoram Nationalist Party (ZNP) ṭhalai office bearer-te nimina ṭhukhawm chuan elected OB-te an siam rem. ZNP ṭhalai hruaitu tharte chu - president Saiṭhuama, vice president Lalṭanpuia Zote leh treasurer Laldawngliana te an ni.

Thilpek hlan
23 Sector Assam Rifles hnuaia awm Thundering 10th Battalion Assam Rifles, Champhai chuan nimin khan Civic Action Programme chi khat an kalpuina atan Genesaret Gospel Home, Champhai hnenah solar power plate 12, battery pathum leh inverter pahnih an hlan. Thilpek hlanna hunah hian Champhai SP Brijendra Kumar Yadav, 10th AR commandant Col Brijendra Singh-te pawh an tel a ni.

Sangha khawi zir
Agricultural Technology Management Agency (ATMA), Zawlnuam Block chuan nimin khan Siamliana Hall, Mamitah Composite Fish Culture & Composite Card Breeding Technique tih thupui hmangin training an buatsaih a; Mamit district-a sangha khawitu mi 24 telin sangha khawi dan an zirtir a ni.

Workshop khar
Ni hnih awh, Measles Rubella (MR) Vacccination Campaign kalpuina chi khat Sensitization Workshop, Champhai Block leh Khawbung Block chhunga zirna-ina principal-te tana buatsaih chu nimin khan Champhai IPR auditorium-ah khar a ni.