Ramria Assam khelmual laih enfiah
MZP general headquarters leh sub-headquarters, Vairengte hruaitute chuan February 8, Ningani khan vairengte SDO (Civil) Isaac C Lalrempuia leh SDPO Laltharnghaka te hoin Mizoram leh Assam inrina, Vairengte leh Lailapur inkara Assam sorkarin khelmual an laih mek a hmunah an enho.
MZP thuchhuah tarlan danin, Vairengte leh Lailapur inkar, ramri chu inrâwn hmasa lo chuan khawi state mahin kutthlak lohna tura thu dah a nih avangin, Vairengte police hotute chuan khelmual laih mek chu titawp rih turin an ngen a; February 8-ah chuan khelmual laih mekah hna thawk an awm lo a ni.
MZP hruaitute leh Vairengte SDO leh SDPO-te hian Vairengte auto-rickshaw stand bul teak huana Assam lamin chenna in an sak leh an khawsakna hmun pawh an enfiah nghal a; chu hmuna chengte chuan kum 20 dáwn lai an awm tawh thu te, Assam sorkarah voter ID an neih thute leh, Assam sorkarin an in pawh number a pêk vek thute an sawi.
MZP president L Ramdinliana Renthlei chuan, Assam sorkarin ramri buai leh khawi state mah mahin inráwn hmasa loa kutthlak loh tur an tihna hmuna Assam sorkarin khelmual an lai chu an hrethiam lo hle tih sawiin, "An hnathawh lai tawpsan rih turin kan ngen a. Mizoram chhunga Assam mite'n chenna in sa a, an inbéngbel nghal hi ṭha lo kan ti a, pawi kan ti hle. Mizoram chhunga in saa inbéngbelte hi Mizoram sorkar hian enfiahin, a ṭul anga hma la turin thuneitute kan phut tlat a ni," a ti.
MZP hruaitute hian Vairengte police check gate bula Inner Line Permit (ILP) Cell an tlawh nghal a; Vairengtea ILP Cell-ah hian thawktu pakhat chiah a awm a, ILP temporary permit dil an tam ṭhin avangin thawktu an indaih lo hle niin MZP chuan an tarlang.