Bangladesh nena Insumdawn tawnna sawiho

Mizoram Legislative Assembly hnuaia Committee pêng pakhat, Committee on Public Undertaking member-te chuan nimin khan Raj Bhavan-ah Governor Lt.Gen. Nirbhay Sharma an kâwm a; Bangladesh nena insumdawn tawnna chungchang an sawipui.

Governor chuan, ṭhen­awm ramte nena insumdawng tawn turin Mizoramin eng nge a mamawh a, eng nge a hralh chhuah theih tih hriat hmasak a ngai tih sawiin, "Mizoram tihmasawn turin kan ṭhenawm ram Bangladesh leh Myanmar, ramri hrûla hmunte chu tihhmasawn phawt a ngai a ni," a ti a; chumi kawnga hma la tur ngenna sorkar laipuiah a thlen tawh thu a sawi.

Committee member-te chuan, India ramin zalenna a neih hnua ram ṭhendarh a nih hnuin, hmarchhak bial chuan a dinhmun ngai a awh phak tawh lo tih an sawi a; Integrated Check Post dinna tura ruahman Thegamukh (Bangladesh) leh Kawrpuichhuah (Mizoram)-te chu a hmun ngeia enfiahpui turin Larsap an sáwm a ni.

Cultural exchange leh trade conclave-te buatsaih tha an tih thu sawiin, High Commissioner of India to Bangladesh pawhin a ngaihven thu an sawi a, "Tun aia chak zawka sorkar laipuiin hma a lak theih nan theihtawp min chhuahpui kan duh a ni," an ti.

Committee on Public Undertaking-ah hian chairman chu Lalrinliana Sailo a ni a, member-te chu Vanlalzawma, RL Pianmawia leh Lalrinmawia Ralte te an ni.