Congress sorkartir loh an intihhmuh - ZPM Vice Chairman

Ṭangrual pawl, Zoram Peoples' Movement (ZPM) chuan nimin khan an pisaah inkhawm an buatsaih a; thu sawitu, ZPM vice chairman Dr Kenneth Chawngliana chuan, India rama state dangte chuan Congress party sorkartir loh an intihhmuh mek niin a sawi.

Dr Kenneth Chawng­liana chuan, kum 2014-a Lok Sabha inthlan neih a nih hnuah state assembly inthlanna state 21 a awm tawh tih sawiin, "Punjab state-ah chauh Congress-in sorkarna an chang a, India ram state-dangte chuan Congress party sorkartir loh an intih­hmuh a ni,” a ti.

Central leh state-ah Congress party ni lo an sorkar apiangin hmasawnna lamah awmze neiin, chak zawkin an kal ṭhin nia sawiin, Kenneth Chawng­liana chuan, "Mizoramah pawh Congress sorkar kum 9 chhunga development lama an chak lohzia kan hria a. Hmasawnna, inawpna, vantlang nun siamṭhatnate leh ram venhim kawngah an hlawh­chham hle a ni," a ti a; kum 2018 inthlan lo awm tur­ah ZPM chuan Mizoram politics-ah bung thar an siam dawn thu a sawi a ni.