Khawzawl JNV chungchang sawiho

Khawzawla Jawaharlal Nehru Vidhyalaya (JNV) building sak hna chawlhsan chungchangah February 8, Ningani khan Khawzawla zirlai pawl hrang hrang - MZP, MSU leh Khawzawl Students Association (KSA) hruaitute leh, JNV building satute contractor-te an inkâwm a; harsatnate an inhrilhfiah.

Zirlai pawlte tarlan danin, Khawzawl JNV building sak hna hi a enkawltu chu MAMCO an ni a; MAMCO Managing Director-in NVS, Delhi a dawr duh loh vangin contractor-in an hna thawha bill hmuh tur neihte chu an hmu thei lo a, kum 2013 aṭangin bill an la tawh lo a ni.

Bill lak theih loh leh a chhante chu Governor Lt.Gen. Nirbhay Sharma leh Chief minister Lal Thanhawla te pawh an hrilh tawh a; Chief Minister-in hma a laksak chung pawhin, MAMCO Managing Director chuan hma a la duh chuang lo niin an tarlang. Contractor chuan an harsatna sutkian a nih theihna tura kawng awm chhun nia hriain JNV building chu khâr turin hmalak an tum ta niin an sawi.

Khawzawla zirlai pawlte chuan JNV contractor-te chu zirlaite hma khua ngaia building khâr lo turin an ngen a; an harsatna tawh chu chinfel a nih theih nan hmalakpui an tum thu an hrilh a ni.