Chawpchilha police tirhna TA bill Nuai 362 chuang sorkarin a la bá

Mizoram sorkar chuan boruak eng emaw a awm avanga chawpchilh taka buaina thlenna hmuna police a tirh (emergency deployment)-naah, kum li chhung, June 25, 2021 thleng khan travelling allowance (TA) bill Rs. 3,62,38,387 a bá a, chu'ng zingah chuan Covid-19 kaihhnawiha duty-na TA Rs. 82,79,760 a tel.

Police TA chungchangah hian Vanglaini chuan RTI Act hmangin June 25, 2021 khan dilna Police Headquarters-ah a thehlut a, ni 20 ral hmain, July 13, 2021 khan chhanna a pe chhuak. Kum 2017-18, 2018-19, 2019-20 leh 2020-21 chhunga chawpchilh taka police-te tirhna (emergency deployment) TA bill atana sensoah hian, Covid-19 duty-na atana TA ṭhahnem tak a tel a ni.

Zawhna chhannaa tarlan danin, kum 2020-21 chhungin Aizawl SP hnuaia police-te chêt velna atan Rs. 13,38,560 sèn a ni a, kum 2019-20 chhung khan Covid-19 kaihhnawihah 2nd IR police-te pawh tirh chhuah ṭhin niin, chuta tan chuan Rs. 19,57,500 hman a ni a, kum 2020-21 ah Rs. 49,83,700 hman a ni bawk. Covid-19 duty avanga emergency deployment-ah Rs. 82,79,760 hman a ni tawh a, chu'ng TA bill-te chu pek a la ni lo.

Hetih lai hian, ramri buai kaihhnawihah kum 2020-21-ah 2nd IR police-te tirh (law & order duty at Vairengte) niin, an TA bill chu Rs. 2,68,800 a ni a, mahse, pêk an la ni lo.

Kum li chhung hian police-te chu chawpchilh takin buaina leh harsatna hmunah tirh ṭhin an ni a, chutih laiin, unit ṭhenkhat chuan chhuah miah loh kum an nei.

2nd IR leh 4th IR police-te chu nuai 90 chuang TA bill batsak mek an ni a, 1st MAP, 1st IR leh PTS Thenzawla police-te chu cheng nuai 30 chuang batsak an ni bawk a; hengte hi a tam zual a ni.