Hripui vei dam tawhte chhuahtir danah Sorkar thu anga kal leh kal lo an awm

Mizoram sorkarin kalphung thar a siam angin, Covid-19 vei, symptom nei lo leh nei nasa lote chu swab sample endik tawh loa chhuahtir an ni. Hetih lai hian, Aizawla veng ṭhenkhat chuan an enkawl community covid care centre (CCCC) bika mite chu hripui an vei tawh lo tih finfiahte chauh an chhuahtir thung.

Covid-19 vei, symptom nei lo leh nei nasa lote chu hripui an vei tih hmuh chhuah aṭanga ni 10 a tlin tawh chuan swab sample endik tawh loa chhuahtir tur tih chungchangah hian Health & Family Welfare department chuan July 19, 2021 khan hriattirna a tichhuak a, July 20, 2021 aṭangin a takin kalpui ṭan a ni.

Hetih lai hian, Aizawla veng eng emaw zat chuan an venga CCCC bika hripui vei enkawlte chu an chhuah hmain swab sample endik nawn zel phawt a, negative-te chauh chhuahtir turin thutlukna an siam nia thu dawn a ni. Vanglaini palaiin LTF ṭhenkhat hruaitute a biaknaah, hetianga thutlukna an siam chhan chu, negative tih confirm loha inchhuahtir chu him lo palh theia an ngaih vang leh negative ngeia inchhuahtir chu a him zawka an hriat vang a ni tlangpui.

Chanmari Local Task Force hruaitute chuan, an enkawl CCCC-a awmte chu symptom nei miah lo pawh ni se, an chhuah hmain Rapid Antigen Test (RAT) hmangin an swab sample an endik phawt zel dawn a, negative-te chauh an chhuahtir dawn tih an sawi.

LTF-in RAT test kit an lei tih sawiin Chanmari LTF hruaitute chuan, "Kan CCCC-a awmte hi an chhuah hmain RAT hmangin a thlawnin kan test sak phawt dawn. A ṭul chuan CCCC-a awmte pawhin test man chawi an inhuam," an ti.

Chaltlang Lily Veng LTF pawhin an veng CCCC-a awmte chu test negative-te chauh an chhuahtir. LTF hruaitute sawi danin, RAT kit eng emaw zat an lei a, CCCC-a awm, ni 10 awm tling tawh, chhuak thei tura ngaihte chu a thlâwnin an sample an endiksak a, sample endiktu atan an venga laboratory technician awmte tlawmngai turin an ngen a ni.

Lily Veng LTF hruaitute chuan, chhuah hmaa swab test chu CCCC-a awmte pawhin an duh zawk thu sawiin, "A him nge ngein kan hria. Mi dang kài leh palh awm thei vèn a ngai a, kan véng thâwng a, test lohin chhuak se, mi dangin an lo thinhrik zawk thei a ni," an ti.

Chaltlang Lily Veng CCCC-ah hian July 21 khan mi pahnih leh nimin khan mi palite swab sample an endik a, an negative avangin chhuahtir an ni. Nimin tlai dinhmun angin, CCCC-ah mi panga an la awm mek.

Republic Veng LTF pawhin an enkawl CCCC-a awmte chu Covid-19 negative tih finfiahte chauh an chhuahtir. Nimin khan chhuah hun tawha ngaih mi pahnih RAT-in an endik a, an negative avangin an chhuahtir nghal a; mi 14 an la enkawl mek a ni.

Vanglaini palai zawhna chhangin Republic Veng LTF hruaitute zinga mi L Ramdinliana Renthlei chuan, swab sample endik nan RAT kit eng emaw zat an lei tih a sawi a, "A thlâwnin kan endik. Test kan tih chhan ber chu, mipui leh chhungkaw rilru damna leh himna tura kan hriat vang a ni ber," a ti.

Aizawla Covid-19 vei hmuh chhuah tamna ber nia hriat veng pahnih - Chhinga Veng leh Saron Veng te erawh chuan an veng CCCC-a awm, ni 10 awm tling tawh, symptom nei lote chu sorkarin ruahmanna a siam angin, sample endik tawh loin an chhuahtir.

Saron Veng LTF chairman Chuauhluna chuan Vanglaini zawhna chhángin, sorkarin ruahmanna a siam angin an kal tih a sawi a, "Chutih rualin, sorkar anga kan kal lohna chu, chhuakte hi mahni inah kár khat chhung inkhung zui tur leh chhuak lo turin kan ti a, sorkar chuan chhuah zalen tawp turin a ti thung," a ti.

Chuauhluna chuan, "A tìrah chuan keini pawhin RAT test tih kan rawt a, mahse, kan doctor-te lamin a ṭul lo e, an tih avangin RAT chu kan ti ta lo," a ti bawk. Saron Veng CCCC-ah hian nimin khan mi 30 vel an awm mek a ni.

Chhinga Veng LTF hruaitute pawhin, CCCC aṭanga chhuah hun tawhte chu an chhuah hmain RAT hmanga endik an ni dawn lo tih an sawi a, "Mahse, ni sarih chhungin inkhung zui turin kan ti thung," an ti. Chhinga Veng CCCC-ah nimin khan mi 120 vel an awm nia thu dawn a ni.