Aizawla swab sample endik rûnpuiah Ni hnih chhungin hripui vei 366 hmu

Health minister Dr R Lalthangliana hoin nimin khan Secretariat conference hall-ah Aizawl leh a chhehvela swab sample endik rûnpui (mass testing) neih mek sawiho a ni a; endik rûnpui ni hnih chhungin sample 10,002 endikah Covid-19 vei mi 366 (3.66%) hmuh chhuah a ni tih an tarlang.

Dr R Lalthangliana chuan, Aizawla total lockdown puan chhunga hripui inkai chhàwnna chhu chat turin sample endik rûnpui kalpui a nih thu sawiin, "Hei hi lockdown kan kalpui chhan ber pawh a ni. Kolkata Airport-a test kit báwm 82 táng reng zinga 75 chu vawiinah a rawn thleng," a ti a; bawm sarih dang kar leh Thawhlehniah a thlen dawn thu a sawi.

Covid-19 thupuangtu Dr Pachuau Lalmalsawma chuan, sample endik rûnpui ni hnih neih chhungin mi 10,002 endik a nih thu sawiin, "Positive 366 (3.66%) hmuh a ni tawh a, heng data-te hi uluk taka ennawn leh a la ngai a, srf ID pek a, COWIN portal-ah thun vek a ngaih avangin result kimchang tarlang turin hun a duh rei a ni," a ti.

Dr Lalmalsawma chuan, sample endik rûnpui atana data entry operator 25 leh laboratory technician 24 rawihte chu team pangaah ṭhen an ni a, result rang taka siam turin data entry operator volunteer lak belh an mamawh dawn thu a sawi.

GAD Aviation Wing principal consultant J Lalhmingliana chuan, hripui dona hmanraw mamawhte chatlak loa phurh thlen a nih theih nan chawlkar khata thlawhtheihna thlawk zat tihpun a ṭula a hriat thu a sawi a, "Khualzin rawn thlawk lut/haw zingah Lengpui Airport screening point-ah Covid-19 hri kai mi 118 (May-ah 97, June-ah 8, July-ah ni 21 thlengin 13) hmuh chhuah a ni. Passenger rawn lut zinga 1.64% positive an ni a, thlawhna pakhat zelah positive 2.03% hmuh chhuah ang a ni," a ti.

Tarlan danin, mi 200 awm theihna ICFAI University CCC chu hman theih tura peih a ni a, mi 300 awm theihna tur Falkland Venga RAY building pawh luah vat turin ruahman a ni. State Referral Hospital-ah July 15-22, 2021 chhungin ICU khum 34 awmnaah chawhrualin ni tin mi 44 (awmpuitu telin) an awm a, khum 273 awmna ward hrang hrangah ni tin damlo 305 (awmpuitu telin) an awm bawk.

Ṭhutkhawmah hian Covid-19 Medical Operational Team chairman Dr ZR Thiamsanga, Health secretary R Lalramnghaka, Health department leh ZMC hotute pawh an tel a ni.