Sample endik rûnpuia hripui vei hmuhte result-ah telh an la ni lo

July 20, 2021 (Thawhlehni) aṭangin Aizawl khawpui chhung leh a chhehvelah swab ample endik rûnpui neih ṭan a ni a, nimin thlengin neih a ni tawh. Endik rûnpuiah hian Covid-19 vei mi 400 chuang hmuh chhuah tawh ni mah se, chu'ngte chu IPR department-in zing tina Covid-19 positive result an tihchhuahah a la tel lo.

Tarlan tawh angin, sample endik rûnpui ni hmasa ber July 20 (Thawhlehni) khan Aizawla veng panga leh Tuirialah hripui vei mi 111 hmuh chhuah a ni a; July 21, Nilaini khan Rangvamuala Ch Saprawnga Terminal leh Aizawla veng paliah endik runpui neih leh niin, hripui vei mi 226 hmuh chhuah leh a ni.

July 21-a mass test-a hripui vei hmuh chhuah dan chu - Bethlehem Vengthlangah sample 1,698 endik aṭangin mi 29, Chhinga Venga sample 1,024 endik aṭangin mi 60, Ramthar Venga sample 1,650 endik aṭangin mi 75 leh Armed Veng South-a sample 991 endik aṭangin mi 60 an ni a; an vaiin mi 226 an ni.

Sample endik rûnpui hi nimin khan khua leh veng ṭhenkhatah chhunzawm a ni a, hripui vei mi eng emaw zat hmuh chhuah nia hriat a nih rualin, a zat chiah kan hre hman lo.

Endik rûnpuia Covid-19 positive hmuh chhuahte chu vawiin (tukin)-a result chhuakah telh hman beisei a nih thu dawn a ni. Health department aṭanga thu dawn danin, Covid-19 positive data chu uluk taka ennawn ngai leh srf ID pek ngai, COWIN portal-a dik taka thun vek ngai a nih avangin result siamin hun a duh rei a; endik rûnpui buaipui tur hian laboratory technician 24 leh data entry operator 25 rawih lailâwk an ni.