ASF vangin vawk 16,558 thi tawh

African Swine Fever (ASF) vangin nimin thleng khan Mizoramah vawk 16,558 a thi tawh. ASF hi Mizorama district tinah hmuh a ni tawh a, khua/veng 216 chu ASF lênna hmun (infected area)-ah puan tawh a ni.

Aizawl district chu ASF infected area tamna ber niin, Mizorama infected area puan tawh zinga 47.22% chu Aizawl district-a mi a ni. Mizorama ASF vanga vawk thi 41.39% chu Aizawl district-a mi a ni bawk.

Animal Husbandry & Veterinary (AH&Vety) department hriatpuinain ASF infected area 216 zinga 76-ah vawk 5,775 suat a ni tawh a, ASF infected area páwn lama khua/veng pasarihah vawk 162 suat tawh a ni.

March 21, 2021 aṭanga nimin thleng khan ASF infected area-a puan ni lo khua/veng 75-ah chhan hriat lohin vawk 403 a thi tawh bawk.

AH&Vety department chuan, chhan hriat loha vawk leh sanghal thi hriate chu phone number 8731975444 leh 8974027269-ah hriattir zel turin an ngen a ni.