Sorkarin zirtirtu 154 a rûkin a la - NSUI : Bàntira dan anga dik taka la turin an phût

National Students' Union of India (NSUI) Mizoram State chuan thuchhuah siamin, kumin 2021 tìr lam khan sorkar sikul 100-a thawk tur zirtirtu 154 a rûkin Mizoram sorkarin a la niin an tarlang a; zirtirtu 154 lakte chu chawlhtir vek a, dan anga dik taka la turin Mizoram sorkar an phût.

NSUI Mizoram chuan, "Kum 2021 tìr lamah khan sorkar high school 95, RMSA high school pali leh lumpsum grant-in-aid high school pakhat, a vaiin high school 100-a thawk turin zirtirtu 154 lai a rûkin lak a ni," an ti.

NSUI tarlan danin, zirtirtu 154 lakna turin advertisement chhuah a ni lo a, tute lak nge an nih hriat a ni lo a, appointment/engagement letter pawh pek an ni lo. Tute'n emaw an thawhna tur H/S-ah joining report pe turin an hrilh a, hrilh an nih ang chuan joining report an pe tawp a ni.

H/S lam pawhin zirtirtu thar an neih chu lawm takin an lo thawhtir mai a, joining report chu an bialtu DEO-te hnenah an thawn a, chumi aṭang chuan DEO-te'n an district-ah zirtirtu thar an awm tih an hre ve chauh a ni.

Zirtirtu atana lak mi 154 zinga ṭhenkhat chu H/S zirtirtu atana tling lo (qualify lo)-te an nih thu sawiin NSUI chuan, "Mumal lo taka zirtirtu lak a ni hi pawi kan ti tak zet. Sorkar sum hmanga hlawh pek tur an nih chuan engtin nge Finance department hian an hlawh tur a pek ang tih hi ngaihtuah tham leh en zui ngai tak a ni," an ti a; mahni duhsak zawngte hnaa thun luh nana zirna hmang lo turin Mizoram sorkar an phût thu an sawi.

NSUI chuan, "Zirtirtu lak thar mi 154-te hi an hna aṭanga chawlhtir vek tur leh zirtirtute hi dan ang taka advertisement chhuaha qualified teacher ngei la ṭha leh turin Mizoram sorkara thuneitute kan phût tlat a. Bàn an nih a, lâk ṭhat a nih loh chuan a ṭul ang zelin hma kan la dawn a ni," an ti.