ZPM ṭhalaiin kawng siam a chhia an ti

ZPM Ṭhalai, Serchhip Block hruaitute chuan, Mualcheng Arṭahkawn - North Vanlaiphai inkar kawng laih zauh leh blacktop hna thawh mekah hna a chhe hle niin an tarlang a; a ṭul anga hma la turin Mizoram sorkar an phût.

Serchhipa ZPM ṭhalaite chuan, Home minister Lalchamliana biala kawngpui siam mekte chu sawiselna a awm avangin July 21, Nilaini khan Mualcheng Arṭahkawn - N Vanlaiphai kawng leh Chekawn - N Vanlaiphai kawng laih zauh mekte an enfiah tih an tarlang.

ZPM ṭhalaite chuan, "Arṭahkawn - N Vanlaiphai inkar kawng laih zauh leh blacktopping hna thawh mek chu a hna a chhiain a lungawi lohthlak kan ti hle. Sorkar pawhin hna thawh mek hi enfiah se, a ṭul anga hma la turin kan phût a ni," an ti.

Serchhip ZPM Ṭhalai tarlan danin, Arṭahkawn - N Vanlaiphai kawng siam mek chu PMGSY hnuaia thawh a ni a, contractor chu Bhavya Construction a ni. Kawng laih zauh (widening) zawh ṭêp ni tawh mah se, blacktop a chhe hle a, fûr khat pawh a tawrh hmain hmun tam takah a chhe leh tawh a ni. Hmun ṭhenkhatah chuan kut lâwnga kheuh khawh mai theih a awm nual bawk.

Chekawn - N Vanlaiphai kawng laih zauh hna, km. 21-a thui, cheng nuai 1,386 senna tur chu LZ Constructions, Aizawlin an thawk a ni.