KHAWTHLIR

Thisen pe
Adventist Youth Fellowship (AYF) Aizawl East Branch chuan nimin khan Civil Hospital, Aizawl Blood Bank-ah thisen pek an huaihawt a, thisen unit 41 an pe a, petute mipa 34 leh hmeichhia pasarih an ni.

Swab test rûnpui
Nimin khan Aizawl leh a chhehvela veng/hmun 12-ah swab sample endik rûnpui neih leh a ni a, result kan hre hman lo. Endik rûnpui ni thumnaah hian Armed Veng South, Bawngkawn, Bethlehem Vengthlang, Chhinga Veng, Electric Veng, ITI Veng, Ramthar Veng, Salem Veng, Saron Veng, Tuirial, Venghlui leh Ch Saprawnga Truck terminal, Rangvamualahte endik a ni a; vawiinah Baktawng Tlangnuam (Chhuanthar), Phunchawng, Rangvamual, Sairang leh Sihhmuiahte endik rûnpui neih leh a ni ang.

CM Relief Fund
Chief Minister's Relief Fund for Covid-19-ah Synod Office Staff Welfare chuan nimin khan Rs. 2,00,000 an chhung lut. CMRF for Covid-a sum lut tawh chu Rs. 29,21,22,678 a ni a, Rs. 25,31,14,470 hman tawh niin, hman loh Rs. 3,90,08,208 a la awm a ni.

Heroin man
Mizoram Police, Zemabawk North khawtlang leh Central YMA ṭangho chuan July 21, Nilaini tlai khan Zemabawk North-ah heroin hawng 55 leh a neitua puh Vanlalhruaia (33) s/o Benjamin, Zemabawk North nia inchhal an man a, NDPS Act hmangin thubuai ziah luh a ni. Ruihhlo an man hi tualchhunga hralhna angin Rs. 30,25,000 vel man a ni.

Ram dang zu man
Serchhipa hmunpui nei Assam Rifles-te chuan nimin khan Zokhawtharah Myanmar aṭanga lak luh zu leh beer eng emaw zat an man a, a vaiin Rs. 1,44,000 hua chhût a ni. ram dang zu leh beer an mante hi Champhaia Excise & Narcotics department hnenah an hlan a ni. Lungleia hmunpui nei AR-te chuan nimin khan T Dumzau khuaah khaw mipuite human right chungchang an zirtir a, tualchhung mi 36 an tel a ni.

MRB branch 90-na hawn a ni
Mizoram Rural Bank (MRB) chairman V Jaya Chandra chuan nimin khan Mimbung khuaah branch thar a hawng a, MRB branch 90-na a ni. Jaya Chandra chuan, MRB branch hawn thar chu Mimbung leh a chhehvel khuate tan hmasawnna thlentu a nih ngei a beisei thu a sawi a; chhungkaw tina bank account hawng thei chin apiang account hawnga bank hmang ṭangkai turin a ngen. MRB hi September 27, 1983-ah din a ni a, Mizorama RD block tinah branch an nei tawh. Kum 2011 aṭangin CBS hmangin branch zawng zawng thlun zawm vek a ni tawh a ni.

Kawng laih tur hawng
Khawzawl DC Zothanmawia chuan nimin khan Khawzawl Lungvar Venga JNV gate bulah National Highway No. 6 (Seling-Champhai) double lane-a zauh hna thawh meka Khawzawl leh Champhai inkar kawngpui km. 26.78-a thui laih bul ṭan tur a hawng. Tuna state highway awm mekah Khawzawl leh Champhai inkar kawngpui chu km. 40-a thui a ni a, kawngpui laih thar NH no. 6-ah chu km. 26.78-a thui tur a ni dawn a, a hma aiin km. 13-in a tâwi zawk dawn a ni. Kawngpui laih nan hian Rs. 37,04,32,00,000 ruahman a ni a, NHIDCL hnuaia Balaji Construction-in an thawk ang. Kum hnih chhunga lai zo tur leh kum nga dang enkawl zui tura tih an ni.