Covid-19 vangin mi 3 thih belh

Nimin khan Covid-19 vangin Mizoramah mi pathum an thi a, nimin tlai dar 5 thlenga hripui vanga thi chu mi 130 an ni tawh.

Covid-19 vei enkawl lai Lalramliana (44) h/o V Lalhriatpuii, Bawngkawn chu nimin zing dar 2:20 khan State Referral Hospital-ah a thi a, nimin chawhma dar 10 khan Bawngkawn YMA Hall-ah vui a ni. Thu dawn danin, Lalramliana hi cancer vei a ni a, Covid-19 positive a ni tih July 14, 2021 khan hmuh chhuah niin, SRH-ah dah luh a ni.

Nimin zing dar 6:05 khan Khamliana (87), Armed Veng South chu SRH-ZMC-ah Covid-19 vangin a thi a, nimin chawhma dar 10 khan Armed Veng South thlànmual inah vui a ni. Amah hi hripui vei a ni tih July 18, 2021 khan hmuh chhuah a ni a, SRH-ah admit nghal a ni. Thisen sáng leh zunthlum nei sa a nih thu khawtlang hruaitute chuan an sawi.

Covid-19 vei enkawl lai MT Lawia (98) h/o Ngulneitlingi, Reng­tekawn, Kolasib pawh nimin zing dar 7:20 khan Kolasib District Hospital (dedicated covid health centre)-ah a thi a, nimin chhun dar 12 khan thlanmualah vui a ni. Amah hi Covid-19 positive a ni tih July 16, 2021-ah hmuh chhuah niin, Kolasib DCHC-ah enkawl nghal a ni a; natna dang sawi fak tur a nei lo nia thu dawn a ni.