CCC-a awmte'n ei man an pek turah Mi 45 vel ngaihhnathiam an ni tawh

Covid-19 vei vanga Covid care centre (CCC)-a awm, below poverty line (BPL) chhung­­kuaa mite ni loin chaw ei man pek a ngaih chungchangah, harsatna neite chu chaw ei man chawi lo tura tih theih a nih angin, mi 45 vel ngaihhnathiam an ni tawh.

Health & Family Welfare secretary R Lalramnghaka chuan June 23, 2021 khan CCC-a awm, BPL chhungkuaa mite tan chaw ei man pek a ngaih loh thu leh BPL chhungkuaa mi ni lote'n mahni chaw ei man an intum a ngaih tawh tur thu a puang a ni. BPL chhungkuaa mi ni lo, chhungkaw khawsaka harsatna neite'n officer-in-charge kaltlangin bialtu chief medical cfficer (CMO) hnenah ei man cháwi loh an dil thei bawk.

Sorkar thuchhuak ang chuan, ei leh in man pek chungchanga harsatna neite CMO-te'n uluk taka ngaihtuahin, chaw ei man chawi lo turin emaw, a ṭhen a zár chauh chawi turin emaw a ti thei a ni. Mizoramah sorkar enkawl CCC 55, force & company CCC paruk leh paid CCC pahnih a awm mek.

Health department-in district a ṭhen zinga CMO ṭhenkhat Vanglaini palaiin a biaknaah, BPL chhungkaw member ni lo zinga ei man pe thei lo leh harsatna neite chu ngaihhnathiam ṭhin an nih thu an sawi.

Aizawl West CMO Dr Thani Pachuau chuan, ei leh in mana harsatna neih vanga dilna thehlut an awm nual thu sawiin, "BPL chhungkua ni lo, chhungkaw harsa bakah, ration card nei lo te, Aizawla awm nghet lote an awm a, chu'ngte chu an veng LTF-te'n dilna an rawn siamsak ṭhin. Mi 15 vel hnenah ngaihhnathiamna kan pe tawh," a ti a; hripui vei an pun zel avangin dilna lut a awm belh zel theih thu Vanglaini a hrilh.

Lunglei CMO Dr LC Liana chuan Vanglaini palai zawhna chhangin, BPL chhungkuate ei leh in chungchang chu sorkar thuchhuak anga an kalpui thu a sawi a, "BPL chhungkua ni lo, mahse, chhungkaw harsatna avanga ei leh in man pe thei lote'n an VTF kaltlangin dilna an rawn siam a, harsatna vanga pe thei lo an nih avangin kan hrethiam a, kan chawitir lo," a ti a, mi 30 vel an ngaihhnathiam tawh thu a sawi.

Siaha CMO Dr C Hnichho chuan, ei leh in mana harsatna neih vanga dilna thehlut an la awm loh thu a sawi a, "Ei leh in manah chuan harsatna nei an la awm rih lo niin kan hria. Mahse, hnam dang pakhat chuan a awmna bill-ah pawisa a nei daih loa, a pek theih bak zawng kan ngaidam," a ti.

Champhai, Serchhip, Lawngtlai leh Mamit district-a CMO-te pawhin BPL chhungkuaa mi ni lo zingah CCC-a ei leh in man pek theih loh vanga harsatna nei, ngaihhnathiam dil an la awm loh thu an sawi bawk.