Covid-19 vangin mi 3 thi

Covid-19 vei enkawl lai Saizinga (75) f/o Lalrem­tluanga, Falkawn chu July 22, Ningani zan dar 11:15 khan State Referral Hospital-ah a thi a, nimin khan Falkawnah vui a ni.

Thu dawn danin, Saizinga hi inenkawl turin Armed Veng South-a a chhungte hnenah a awm a, chuta ṭang chuan hripui a vei tih hmuh a ni. Covid-19 positive a ni tih July 5, 2021-ah hmuh chhuah a ni a, a tuk July 6-ah State Referral Hospital-ah dah luh a nih thu sorkar thuchhuakin a tarlang.

Nimin tlai dar 5:45 khan Ebenezer (37) s/o Hmingthangvela, Vaitin, Aizawl district chu SRH-ah a thi. Covid-19 positive a ni tih July 13, 2021-ah hmuh chhuah niin, July 16-ah SRH-ah enkawl ṭan a ni a; thisen sang nei a nih thu khaw­tlang hruaitute'n an sawi.

SK Das (74), Tuirial pawh nizan dar 6:50 khan hripui vangin SRH-ah a thi a, sorkar chhin­chhiah angin, hripui vanga Mizorama thi 133-na a ni. Amah hi Covid-19 vei a ni tih July 13 khan hmuh -chhuah a ni a, July 16-ah SRH-ah dah luh a ni.