Swab sample endik rûnpui aṭangin Hripui vei mi 500 chuang hmu tawh

Aizawl khawpuiah July 20, 2021 aṭanga swab sample endik rûnpui neihah July 22, Ningani thleng khan hripui vei mi 479 hmuh chhuah a ni tawh a, nimin khan mi eng emaw zat hmuh chhuah leh niin, chu'ng zingah chuan Baktawng Tlangnuama hmuh chhuah mi 80 an tel. Endik rûnpui aṭanga hripui vei hmuhte hi Covid-19 positive result tihchhuahah an la tel lo.

IDSP chhinchhiah danin, Aizawl leh a chhehvela swab sample endik rûnpuiah hian July 20 khan mi 111 leh July 21-ah mi 226 hmuh chhuah a lo ni tawh a; July 22, Ningani khan Aizawla veng pangaah sample 4,431 endik aṭangin mi 113 (2.55%) hmuh chhuah leh a ni bawk.

July 22-a endik rûnpui aṭanga hripui vei hmuh chhuah dan chu - Bawngkawnah sample 1,183 aṭangin mi 40 (3.38%), Venghluiah sample 979 aṭangin mi 37 (3.77%), Salem Vengah sample 495 endik aṭangin mi 18 (5.54%), Ramthar Vengah sample 1,010 aṭangin mi 13 (1.28%) leh ITI Vengah sample 764 aṭangin mi panga (0.65%) a ni.

July 20-22 (ni thum) chhungin sample 14,433 endik a ni a, Covid-19 positive mi 479 hmuh chhuah niin, chu chu 3.32% a tling.

Nimin khan Aizawla veng ṭhenkhat leh Baktawng Tlangnuam (Chhuanthar)-ah sample endik runpui neih leh a ni a, hripui vei hmuh chhuah zat kimchang kan hre hman lo. Hriat theih chinah Chhuanthar hmunah hian nimin tlai dar 5 thleng khan sample 1,255 endik tawh niin, hripui vei 80 hmuh chhuah a ni a, percentage chu 6.37% a ni. Chhuanthar­ah hian mi 2,224 an cheng a, he thu ziah lai hian la endik mek zel a ni.

Baktawng Tlangnuamah hian ni sarih liam ta chhung khan Covid-19 vei mi 163 hmuh chhuah a lo ni tawh a, chumi avang chuan nimin khan endik rûnpui kalpui a ni.

Sample endik rûnpuia hripui vei hmuh chhuahte hi IPR department-in zing tina Covid-19 positive result a tihchhuahah telh a la ni loa thu dawn a ni. Sorkar thuchhuah chuan, sample endik zawng zawng srf ID generate a ngaih bakah, COWIN portal-ah thun phawt a ngai ṭhin a, uluk leh fimkhur taka enfel a ngaih avangin hmanhmawh theih a ni lo tih a tarlang a, "SRF ID generate hnua COWIN portal upload a nih hnuah official data tihfel a ni ang," a ti.