Plastic Resource Management Centre thar hawng

Kolasib DC Dr H Lalthlangliana chuan nimin khan Public Health Engineering department, Kolasib WATSAN Division hnuaia Thingdawla Plastic (Waste) Resource Management Centre (PRMC) sak thar a hawng.

Dr H Lalthlangliana chuan, plastic chu thil ṭangkai tak a nih rualin, hman zawh hnua sâwngbàwl ṭhat loh chuan hnawksak tak si a nih thu a sawi a, "Mumal taka sâwngbâwl theihna tur hmun buatsaih a ni hi a lawmawm. Plastic aṭanga siam hman tlem, hman nawn theih theih hman nawn zel leh thil dang ṭangkai siam chhuah nana sawngbawlte hi mi tinin zawm a pawimawh," a ti.

Sorkar laipuiin kum 2016 khan Solid Waste Management Act-a duang tih sawiin Dr Lalthlangliana chuan, "Plastic thliar hran dan turte a tel a, Mizoramah pawh 2019 aṭang khan hetiang zûlzui hian dan siam a ni," a ti a; dan hnuaiah hian plastic micron 50 aia pan hman phal a nih loh thu a sawi.

PHE executive engineer H Lalsiamliana chuan, plastic hnawmhnawk leh plastic ûmte chu sawngbawl hautak tak a nih thu a sawi a, "Hâl ral dawn pawha boruak thianghlim lo siamtu a nih avangin hman nawn leh tura a sawngbawlna hmuna thawn a ṭul," a ti.

Thingdawla PMRC hi Swachh Bharat Mission (Gramin) hnuaiah Rs. 16,00,000 hmanga sak a ni a, plastic nem mukna kháwl (baling machine) leh a bunna tur RCC building a awm. Hawnna inkhawmah hian sorkar official tlem azawng leh PHE Kolasib WATSAN Division hotute leh Thingdawl khawtlang hruaitute an tel a ni.