Swab sample endik ngawrh turin inchah

Health minister Dr R Lalthangliana hoin nimin khan district pakua DC leh chief medical officer (CMO)-te'n video conferencing hmangin Covid-19 dona leh a kaihhnawih thil chi hrang hrang an sawiho a; Minister chuan swab sample endik hna ngawrh turin a chah.

Dr R Lalthangliana chuan, Covid-19 donaa district-te hmalakna lawmawm a tih thu sawiin, "Vaccine pekah theihtawp chhuah chhunzawm zel ula. India rama vaccine pe kim hmasa ber state ni turin in bial ṭheuhah ṭan la ang che u," a ti a; swab sample endikah hripui inkai chhàwnna chhut chah a nih theih nan sample endik ngawrh turin a chah a ni.

Sample endikna RAT kit (hmanrua)-ah harsatna a awm loh thu sawiin R Lalthangliana chuan, "In mamawh ang zat rawn la thuai thuai zel ula, Covid-19 third wave lo thleng theia sawi laka inbuatsaih nan naupangte enkawlna tur ruahmanna siam ang che u," a ti. PM Cares hnuaiah district tinah oxygen plant dah tum a nih thu leh Mizoram sorkarin cheng nuai 600 vel a sèn ve a ngaih tur thu a sawi bawk.

Ṭhutkhawmah hian, Lunglei district tih loh district dang zawngah total lockdown kalpui a nih loh thu tarlan a ni a; tun dinhmunah containment zone awm lohna district paruk a awm.

Bawrhsapte chuan, an district dinhmun thlirin mipuite'n sorkar inkaihhruainate an zawm ṭha a, harsatna lian tham an la tawh loh avang leh hripui inkai chhàwnna an la thunun theia an hriat avangin fimkhur takin hunbi tukin dawr hawn a nih thu an sawi.

District tinah swab sample endik chungchangah harsatna an neih loh thu te, CCC leh CCCC-ah harsatna tâwk an la awm loh thu te, Covid vaccine tluang taka pek zel a nih thu te, hmun ṭhenkhatah erawh chuan chhan hrang hrang vanga vaccine la ngam lo an awm thute tarlan a ni bawk.