CCC siam belh dan tur ngaihtuah

Secretariat conference hall-ah nimin khan sorkar hotute'n Aizawla Covid care centre (CCC) siam belh chung­chang an sawiho a, Health & Family Welfare minister Dr R Lalthangliana'n a kaihruai.

Health Minister chuan, fûr ruahtui tam lai a nih avangin Covid-19 veite dah tamna ber Durtlang BSUP CCC chu luah a remchàn loh thu a sawi a, "Covid-19 vei an pun nasat avangin enkawlna tur CCC remchang dap a ngai a ni," a ti.

Dr R Lalthangliana chuan, CCC tur buatsaih kawngah, a chei ṭhat hna thawhsak ṭhintu technical department - PWD, PHE leh Power & Electricity-te chungah a lawm thu a sawi.

Ṭhutkhawmah hian, mi 350 dah theihna tur Mualpuia MSSC Hostel pahnih sak zawh hlim chu CCC (Salem Veng Mualpui CCC) atan ruahman a nih thu leh, PWD, PHED leh PE department-te'n cheibàwl ngai zual an tih fel hnuah luah ṭan theih a nih dawn thu tarlan a ni.

Falkland Venga mi 300 dah theihna Rajiv AwasYojana (RAY) building chu CCC atan chei ṭhat mek a nih thu te, Kulikawn Hospital chu DCHC-a hman tura ruahman a nih avangin psychiatric ward-a damlo enkawl mekte chu ITI Venga Health department building-ah sawn tura ruahman a nih thu leh kar leh tìr lamah luah theih beisei a nih thu te, Kulikawn DCHC-ah hripui vei damlo 50 dah theih tura ruahman a nih thute an sawi bawk.

Ṭhutkhawmah hian Covid-19 Medical Opera­tional Team chairman Dr ZR Thiam­­sanga, Health secretary R Lalramnghaka, Health department, PWD, PHED leh PE department aiawhte an tel a ni.