KHAWTHLIR
Total lockdown
Mizoram sorkar chuan July 18 aṭanga Aizawla total lockdown a kalpui chu July 31, 2021 zanlai thleng a pawtsei. Total lockdown pawhsei chhan chu Covid-19 darh chak lutuk tur venna tur leh Health department-in swab sample endik runpui an tih chhunzawm theih nan a nih thu tarlan a ni a; July 16, 2021-a SOP tihchhuah chu hman zui a ni ang. Total lockdown kalpui mek hi zanin zanlaia tàwp tur a ni.
Lirthei tlân hun
World Bank Raod, Sialsuk-Sailam inkar kawngpui siamṭhat hna thawh mek a nih avangin Thawhṭanni leh Inrinni-ah chauh lirthei (LMV leh a hnuai lam) tlan phal a nih thu, Traffic SP Rodingliana Chawngthu chuan a tarlang.
LTF duty-te tlawh
Aizawl North-II bialtu MLA Dr Vanlalthlana chuan nimin khan a bial chhunga local task force-te a tlawh kual a; Ramthar North-a leimin a enfiah bawk. Dr Vanlaltthlana chuan, Aizawl North-II bial chhungah Covid-19 vei mi 350 chuang an awm mek thu thu leh pawi a tih thu a sawi a; LTF-te hnenah hripui laka invenna hmanruate a pe a ni.
Containment zone
Aizawl DC Dr Lalhriatzuali Ralte chuan nimin khan Aizawl veng paruka chhungkaw 155 awmna chu containment area-ah a puang. Containment area-a puan tharte chu - Chanmari West-a chhungkaw 27, Bungkawn Vengthara chhungkaw 24, Muanna Venga chhungkaw 20, College Venga chhungkaw 28, Ramhlun Venglaia chhungkaw 20, Venghnuaia chhungkaw 36 awmnate a ni.
Kulikawn swab test
Kulikawn Local Task Force bultumin nimin khan an vengah swab sample endik (random test) kalpui a ni a, mi 116-te sample endikah Covid-19 positive an awm lo. Sample endikna atan hian Dr Lalmalsawma Nghaka chuan random test neihna atan RAT kit 100 a thawh bakah senso dang a tumsak a ni.
Bawrhsapin DC Complex a enfiah
Khawzawl bawrhsap Zothanmawia chuan nimin khan DC Office Complex siam mek a tlawh a, contractor-te chu ṭha taka thawk a, hunbi tiam chhunga zo turin a chah. Khawzawl DC office tur hi Khawzawl Dinthar Vengah sak tur a ni a; cheng nuai 1,000 sênna tur niin, chhawng thum - a dung ft. 100, a vâng ft. 40 leh a san zawng ft. 39-a sak tur a ni. Khawzawl Bawrhsap hian Hermon Venga power sub-station aṭanga East Lungdar power/electric hrui 132KV line a enfiah nghal a; hrui chu a bula in ṭhenkhat tan a hlauhawm theih avangin hmun sang zawkah a ban phun sawn tura tih a ni.
Serchhipahah zawngṭah ṭiak sem
Thenzawla Obing zau rama Sub-Mission on Agroforestry (NMSA) small nursery aṭangin nimin khan Serchhip District Agriculture pisa hmalaknain zawngṭah ṭiak 9,050 sem chhuah a ni. Serchhip DAO Tlangtimawia Zote chuan, NMSA chu Serchhip district-a hmun pathumah buatsaih tur a nih thu a sawi a, "Thlai ṭiakte chu nakkuma sem ṭan tura tih a nih laiin, thawktute inpekna leh ṭhahnemngaihna azarah a hun aia hmaa sem a ni. Loneitute'n zawngṭah ṭiak in dawnte hi ramngaw siam nan leh sum thawh chhuahna atan ṭangkai takin hmang ang che u," a ti. Zawngṭah ṭiak hi chhungkaw 233 hnenah sem a ni a; Thenzawlah ṭiak 4,900, Kanghmun South-ah 1,710, Neihlohah 890 leh Zote South-ah 1,550 sem chhuah a ni.