Sorkarin Boundary Committee a din Committee-ah tel remchang lo mah ila duhsakna kan hlân - ZPM

Mizoram sorkar chuan July 22, 2021 khan ramri chungchang ngaih­tuahtu tur Boundary Committee a din a, chairman chu deputy chief minister Tawnluia a ni. Ram hruaitu, sorkar mi pawimawh, tlawmngai páwl leh recognised poli­tical party aiawhte an tel.

Boundary Committee-ah hian Home minister Lalchamliana chu vice chairman a ni a, member secretary atan Home department Secretary ruat a ni. Minister zingah K Lalrinliana, Lalruatlkma leh TJ Lalnuntluanga te an tel a; Chief Secretary, Additional Chief Secretary leh DGP-te an tel bawk.

Central YMA, MUP, MHIP, MZP, MSU leh JAC on Inner Line Reserved Forest Demand aiawh mi pakhat ṭheuh an tel a; mimalin Lok Sabha MP hlui CL Ruala leh Home secretary hlui Lalbiakzama te ruat an ni.

Zoram People's Movement (ZPM) chu recognised political party an la nih loh avangin Boundary Committee-ah hian an tel lo a; chutih rualin, Boundary Committee din a ni chu lawmawm an tih thu leh tluang taka kal tura an duhsakna thu Chairman hnenah an thlen.

Tawnluia hnena an lehkha thehluhah ZPM chuan, Innerline 1875 chu ramria an pawm thu te, Boundary Committee din tura an rawt tawh thute an ziak a, "ZPM hi recognised political party la ni pha ve lo leh a hming chauha registered party kan la nih avanga Committee-a telh kan remchang ve lo hian ramri chungchanga kan ṭhahnemngaihna a tihnual lo a, kan ram leh hnam chhanna turah chuan kan theih tâwkin in kaihza kan lo veng tlat ang tih min lo hriatsak dawn a nia," an ti.