Ṭhalai páwl parukte'n Ramri venghim turin sorkar an phût

Mizorama ṭhalai pawl hrang hrangte chuan thuchhuah inṭâwm siamin, Mizoram sorkarin Mizoram ramri atana a lo pawm tawh, Bengal Eastern Frontier Regulation (BEFR) 1875 chu venghim ngei turin Mizoram sorkar an phût tih an tarlang.

Thuchhuah inṭâwm siamtute hi Champhai Ṭhalai Pawl, Chalrang Ṭhalai Pawl, Hnahthial Ṭhalai Pawl, Mamit District Ṭhalai Pawl, Lunglei Ṭhalai Pawl leh Serchhip Youth Club-te an ni.

Ramri chungchanga Vairengtea pawl pathum - MZP, MSU leh Vairengte Ṭhalai Pawlte'n joint resolution an siam chu an thlàwp thu leh thawhpui an ngaihna apianga thawhpui turin an inpeih thu sawiin, "Kan ṭhenawmte politics vir vel avangin kan ram hi chhetê pawh kan chán tur a ni lo," an ti.

Ṭhalai pawl parukte chuan, "BEFR 1875 hi 2006-a Mizoram Legislative Assembly leh Council of Minister ten kan ramri atana an lo pawm tawh a ni," an ti a; an lo pawm tawh ang taka an pawm chin chu hauha venghim ngei turin Mizoram sorkar an phût.

Pawl parukte chuan, ramri chung­chang ngaihtuahtu tur committee din a ni ta chu lawmawm an tih thu an tarlang a, "Ramri venghim tura ṭha taka an thawh theih kan beisei a ni," an ti.