Ngaihdam dil turin ram hruaitu 2 phût

Congress party chuan Assembly speaker Lalrinliana Sailo leh Dampa bialtu MLA Lalrintluanga Sailo-te chu sorkar dan leh thupek bawhchhiaah an puh a; village task force-te leh mipui hnenah ngaihdam dil turin an phût.

MPCC chuan, Covid-19 vanga Mizoram mipui an inkhungbeh tlat laiin deputy govt. chief whip Lalrintluanga Sailo-in July 22-23, 2021 khan a biala khaw hrang hrang a tlawh tih sawiin, "A official tour programme-a a lan danin, official leh MNF party hruaitu mi 17-in an zui a ni," an ti.

MPCC thuchhuah tarlan danin, Lalrintluanga Sailo hian Phuldungsei, West Phaileng, Kawnmawi, Chhippui, Lallen, Saithah leh Phulbial khuate a tlawh a; nimin khan Samagra Shiksha hnuaia sak Phuldungsei HSS hawnna inkhawmah khuallian a nih bakah, Dampa West Block MNF programme siamah a tel a ni.

Lalrintluanga Sailo-in khaw hrang hrang a tlawh lai chu Aizawla hripui vei an tam avanga total lockdown puan lai a ni tih sawiin MPCC chuan, "Mamit DC pawhin July 17 khan SOP tichhuakin, mipui punkhawmna hrim hrim a khap lai, sorkar hnathawkte pawh 50% chiah kal a phal lai a ni. Aizawl aṭanga zin veivâk an hlauh vânglai, VLTF-te pawhin dan khauh taka an kenkawh lai tak a ni a; heti chunga programme siam lui a, official leh party mi a inzuitir duahte hi dan palzûtna dik tak a ni," an ti.

Congress party chuan, kumin July thla tìr khan Assembly speaker Lalrinliana Sailo pawhin chhiat tawhna chhuanlamin Tuichang biala Khawhai leh a chhehvel khaw hrang hrang a tlawh tih sawiin, "A team-te nen mipui vantlang zingah an kal kual nasa a, YMA hnatlanna thlengin an kal a ni," an ti a; hlau chung chungin khaw hrang hrangah an lo dawngsawng niin an sawi.

Lalrinliana Sailo leh Lalrintluanga Sailo-te chêt dan chuan MNF sorkar hruaituten mipui an zah lohzia a tilang chiang hle nia sawiin MPCC chuan, hripui léng vanga khuahkhirhna khauh tak hnuaia mipui an khawsak laia an chêt dan chu hriatthiam theihah an ngai lo tih an tarlang a; "An kalna DC-te'n action an la ngei turah kan ngai a, action an la lo a nih chuan SOP zâwm turin mipui an phût ngam tawh tur a ni lo. Ram hruaitute pahnih hian ngaihdam an dil ngei tur a ni," an ti.