Forensic hmunhma leh bungrua enfiah

Home secretary Lalbiaksangi chuan nimin khan Forensic Science Laboratory (FSL) a tlawh a, Nirbhaya funding scheme hmanga hmalaknate a enfiah. Home Secretary hi Home additional secretary Vanlalmawia’n a ṭawiawm.

Mizoram FSL hian Nirbhaya funding scheme hnuaiah cheng nuai 419 a dawng a, chumi hmang chuan Cyber Forensic Laboratory thar din leh DNA division tihchangtlun hna thawh mek a ni. Lalbiaksangi hian Modernisation grant hmanga FSL-in khawl a lei thar, GC head space leh bullet speed measuring equipment-te a enfiah bawk.

FSL director H Sangchung­nunga sawi danin, FSL-ah hian forensic expert 15 an awm a, an division chhunga an case dawn ṭheuh an khawih bakah, Mizoram chhunga pawi khawihna thlenna hmunah police-in an mamawh ang zelin an kal ṭhin a ni.

FSL-ah hian division pasarih - Chemistry, Fingerprint, DNA, Ballistics & Toolmarks, Questioned Document, Photography leh Toxicology division-te a awm.

Mizoram FSL hian kum 2020-21 chhung khan case 822 leh exhibit finfiah ngai 5,616 an endik a; kum 2021 ral hma ngeiin Cyber Forensic Lab. chu a taka hman theih an beisei a ni.