Vai lal hmaa zâm lo turin CM ngen

ZPM Ṭhalai chuan thuchhuah siamin, chief minister Zoramthanga chu ramri chungchangah vai lal hmaa zâm mai lo tur leh, Cabinet meeting-in Mizoram ram china a pawm tawhah huaisen taka ding nghet turin an ngen.

Union Home minister Amit Shah hoa hmarchhak chief minister-te July 24, 2021-a Shil­long-a an inhmuhkhawm hunah CM Zoramthanga chu zam lo tura chahin ZPM Ṭhalai chuan, "Vai lal hmaa zâm mai lo tur leh, kan pi leh pute aṭanga Mizoram kan tih chin huai taka ṭan ngam a, nghet taka ding turin kan ngen a, duhsakna kan hlan a ni," an ti.

ZPM ṭhalaite chuan, MNF chu NDA leh NEDA-a BJP thawhpui an ni tih sawiin, "Central ministry-ah pawh an mikhual lo hle ang tih a rin theih. Hei hi remchangah hmang a, kan ramri buai chungchangah pawh pangchang ve ngam tur leh Union Home Minister leh CM dangte hmaah pawh zâm mai lo turin kan ngen a ni," an ti a; Mizoram ramri atana Cabinet-in a pawm tawh BERF 1875-ah nghet taka ding turin duhsakna an hlan a ni.