Ramri chungchanga memorandum CM-in Union Home Minister a pe

July 24, Inrinni tlai dar 5:30 khan State Convention Centre, Shillong-ah Union Home minister Amit Shah hoin hmarchhak state chief minister-te an ṭhukhawm a, hmarchhak bial kaihhnawih thil pawimawhte an sawiho. Mizoram chief minister Zoramthanga pawh a tel a, Mizorama páwl hrang hrangin ramri chungchanga memorandum an siam chu Amit Shah hnenah a pe.

Ṭhutkhawmah hian DoNER minister G Kishan Reddy leh Union minister of state (Prime Minister's Office) Jitendra Singh te pawh an tel a; CM Zoramthanga hi chief secretary Lalnunmawia Chuaungo leh director general of police (DGP) SBK Singh te'n an ṭawiawm a ni.

Sorkar thuchhuah tarlan danin, CM Zoramthanga chuan, Mizoram leh Assam ramri chungchang sawiin, ramria buaina chu hun rei tak aṭanga awm tawh, Nagaland, Meghalaya, Arunachal Pradesh leh Mizoramin state nihna an chan tirh laia tihfel loh, tun thlenga harsatna awm zui ta a nih thu a sawi a, "Hemi chungchangah hian Assam chu state dang pali hringtu a nih angin inhmuh thiam lohnate chinfelnaah rilru puitling tak pu turin ka beisei a ni," a ti.

Zoramthanga chuan, Assam-in constitutional boundary anga a chhàl ram zau tak chu Mizote'n kum za chuang lo leh leilet atan an hman tawh a nih thu sawiin, "Assam CM nen June 29, 2021 inbiaknaa May 10, 2021 anga 'status quo maintain ni se' tia kan lo sawi dun tawh chu a taka kalpui tlang ngei ni se," a ti a; ramri-ah remna awm thuai se a duh thu leh inrem taka awm a nih theih nan meeting neih mek chu a pawimawh thu a sawi.

CM Zoramthanga chuan, tun hnaia Myanmar aṭanga ráltlân Mizorama lutte chungchangah, Mizoramin theihtawp chhuahin riahna leh ei tur pe mah se, state sum neihin a tlin vek loh avangin sarkar laipui a inrawlh a pawimawh thu a sawi a; an sahimna zawnga rawn lut an ni tih chu haider lo turin sorkar laipui a ngen.

Chief Minister hian Ministry of Home Affairs kaihhnawih thil pawimawh dangte leh sorkar laipui aṭanga sum hmuh kaihhnawih thil dangte a sawi a; Central sponsored scheme, externally aided project (EAP), special central assistance to states for capital expenditure, NEC leh DoNER hnuaia budgetary allocation hmuh danah state tê tana harsatna awm ṭhin chu ennawn a ngaih thu te, Eastern Agricultural Marketing Corporation Limited chu Mizoramah pisa din thuai tura a duh thu leh management board-ah hmarchhak state tin aṭangin aiawh awm thei se a duh thute a thlen a ni.

Kumin January thlaa NEC Plenary Meeting vawi 69-naa hmalakna tur hrang hrang bawhzui theihna Mizoramin a neihte a sawi a; Mizoramin hmasawnna atan all India services cadre hran a mamawh thu te, central service-a awmte'n an post-na hmunah neitu thinlung an neih a, ram hmasawnna atan theihtawp an chhuah theih nan Mizoram tan cadre hran siam a ṭul thute a sawi bawk.

Ṭhutkhawm zawhah CM Zoramthanga chuan Home minister Amit Shah hnenah Mizorama political party leh pawl hrang hrangte'n memorandum an siam, kum 2018-a Prime Minister hnena an lo thehluh tawh chu a copy a pe a; ṭawngkain a sawipui nghal bawk. Memorandum hi ramri chinfel leh Boundary Commission for Settlement, Delimitation and Demarcation of Boundary Between Mizoram and Assam din chungchang a ni.

Chief Minister hi Assam CM Himanta Biswa Sarma nen an inkâwm bawk a; ramria state pahnih buaina chu a rang lama chinfel a nih theih nan remchang hmasaah Mizorama zin turin a sáwm a, Himanta Biswa Sharma pawhin tihhlawhtlin ngei a tum thuin a chháng tih sorkar thuchhuahin a tarlang.