Samagra Shiksha hnathawh turte thlirho : Mizoram Samagra sum hmuh tur vbc. 293

School Education minister Lalchhandama Ralte leh department hotute chuan July 23, Zirtawpni zan khan online hmangin meeting an nei a; Samagra Shiksha Project Approval Board (PAB)-in Mizoram tana hnathawh tur a pawmte an thlirho. Mizoram Samagra Shiksha hnathawhna atana sorkar laipuiin a pawm chu cheng vbc. 293 a ni.

Minister Lalchhandama Ralte chuan, Samagra Shiksha PAB meeting-ah beisei dan an neih rualin, hripui léng avangin India ram sum leh pai dinhmun a hniam zel a, beisei san a har thu sawiin, ''Hmuh kan beisei min thlauhthlaksak te, kan beisei ngam loh min tuai tharsakte a awm a, central lamin minute-a an tihsual siamṭhat turte a awm bawk," a ti.

Lalchhandama Ralte chuan, "Hnathawh leh hmalakna turte tihfel a nih hunah chuan hripui léng avanga kum chhiaa kan ngaih hi Samagra lama kan rawngbawlnaah chuan malsawmna tam tak kan hmuh theihna tur, Mizoram zirnain hma lam kan pan theihna tur chhinchhiahtlak tak tak a tam a, a lawmawm hle a ni,'' a ti a; School Education secretary Dr Lalzirmawia Chhangte hoa PAB hmachhawntute an chet ṭhat thu a sawi.

Samagra Shiksha state project director Lalhmachhuana tarlan danin, Samagra Shiksha budget thar chu National Education Policy (NEP) hman hnua budget hmasa ber a ni a; Diksha portal hmangin high school zirtirtu 4,282, higher seondary school zirtirtu 1,798-te online-a training pek tum niin, August 1, 2021-ah ṭan tum a ni.

School Education department hotute tarlan danin, Samagra Shiksha PAB-in a pawm thar zinga a langsar zualte chu - secondary school (high school) thar pali hawn belh tur te, higher secondary school thar Arts stream atan pali, Science leh Commerce inkawp atan pahnih hawn tharte a tel.

Kum danga an la hmuh ngai loh, school compound-a Tribal Affairs hnuaia girls hostel sak tawhte sikul 11-ah hostel enkawlna tur pawm a ni a; vocational education hawn belh nan sikul paruk pawm thar a ni. Virtual laboratory online class elementary leh secondary tana neihpuina tur te, ICT school hnuaia smart classroom kalpuina tur te, hna kal mek chhunzawmna tur kum tina dawn ṭhin te, Hindi zirtirtu 314 lak belhna turte pawm a ni bawk.

Online meeting-ah hian Human Resource Development Board vice chairman L Thangmawia, MLA, Education secretary Dr Lalzirmawia Chhangte leh director James Lalrinchhana, SCERT director Laldawngliani Chawngthu leh officer dangte an tel.