MNS entrance exam turte vailiam

Assam Rifles bultuma Military Nursing Service (MNS) coaching kal, July 28, 2021-a Guwahati-a entrance exam hmachhawn turte chu nimin zing dar 7 khan AR hmuna Loch Hall kawt aṭangin Higher & Technical Education minister Dr R Lalthangliana'n a vailiam.

Dr R Lalthangliana chuan, MNS entrance exam hmachhawn turte chu hlawhtling ngei turin duhsakna a hlân a; Mizo ṭhalai nurse zir chhuak, MNS-a luh tum mi 24 an awm chu lawmawm a tih thu leh MNS-a luh tum pung zel se a duh thu sawiin, "Ram tana rawngbawlna pawimawh leh ropui tak a ni," a ti a; theihtawp chhuaha hmasawn zel tum tur leh an thiamnate ram leh hnam tan hmang zel turin a chah.

Assam Rifles hian MNS-a luh tum Mizo nurse-te tan entrance exam atana inbuatsaihna coaching chawlhkar ruk chhung an kalpui a, chu'ngte chuan July 28, Nilaini hian exam an hmachhawn dawn a ni. Entrance coaching class buatsaihtu Assam Rifles chungah HTE Minister chuan lawmthu a sawi.

MNS hi short service a ni a, hmeichhiate tan sipaia nursing officer nih theihna a ni. Kum nga an thawh hnuah service pawhsei (permanent commission) theih a ni a; payband chu 15,600-39100 level 10 to 11 & 37,400-67,000 level 13-13B a ni.