NESAC Meeting-ah chief minister Zoramthanga a tel

July 24, Inrinni khan North Eastern Space Applications Centre (NESAC) Multipurpose Convention Centre, Meghalaya-ah NESAC Society meeting neih a ni a, Union Home minister Amit Shah-a'n kaihruaiin, chief minister Zoramthanga pawh a tel.

Ṭhutkhawmah hian DoNER minister Gangapuram Kishan Reddy leh Union minister of state Jitendra Singh te pawh an tel a; hmarchhak state-te'n NESAC space technology chu ṭangkai zawka an hman theih dan tur sawiho a ni.

CM Zoramthanga chuan Mizoramin hma a lak tawhnate leh hmasawnna ki hrang hrang atana ruahmanna thar siamte a tarlang a; Mizoramah MIRSAC hnuaia space technology hman ṭangkai a nih thu sawiin, Mizoramin project a thehluhte chu ngaih pawimawhsak ngei a ṭul thu a sawi lang.

Chief Minister chuan, agriculture leh a kaihhnawih department tihhmasawn leh tourism tihchangtlun kawngah te, ruahtui khâwl leh tuihna siam kawnga hmalakna thar awm theite a sawi a; North East Spatial Data Repository (NESDR) portal-ah Mizoram data thehluh fel a nih thu leh NESAC-in NEC-Project geo-tag tura list a siamte pawh geo-tag zawh vek a nih tawh thu a sawi bawk.

Ṭhutkhawm zawhah hian Home minister Amit Shah chuan NESAC Multi-purpose Convention Centre-cum-Exhibition Centre sakna tur lungphùm a phúm a ni.

NESAC hi sorkar laipui hnuaia awm Department of Space leh North Eastern Council thawh dunna society a ni a, hmarchhak state pariatte hman ṭangkai turin space science leh technology lamah kum 20 chuang hma a la tawh a ni.